ORANJESTAD (AAN) -- E biento y stof di Sahara tin comunidad mas cu fada caba. Tin varios aña caba cu e fenomeno meteorologico aki a bin toca region di Caribe y como tal, Aruba;
pero aña pa aña e ta bira mas denso, y perhudicando e salud di hopi hende.
Por corda cu Docter Salazar di DVG a papia riba e tema aki via un canal di television, unda el a menciona cu e biento di Sahara no solamente ta lastra stof, pero tambe particulanan kimico nocivo, bacteria, y mas.
Ohala mas informacion lo por a bin di specialistanan den cuero, alergia, asma y otro tipo di problemanan respiratorio cu ta suma na e riesgonan si contrae Covid-19. Departamento Meteorologico tambe lo ta bon si por publica mas informacion y duna sugerencianan con por yuda combati e efectonan di biento y stof di Sahara.
Segun un ciudadano cu ta sinti su mes hopi afecta, pasobra e ta sufri di alergia cu ta pone nister masha hopi mes, e aña aki e ta sinti cu e stof di Sahara ta hopi mas denso y e biento mucho mas fuerte.
Ora e ta bayendo cas for di trabao tanto merdia como atardi despues di 5’or e ta ripara cu Seroe Hooiberg ta cubri cu un velo shinishi y tin biaha nos atmosfera ta asina carga di e stof aki, cu hasta e visibilidad ora ta stuur auto, ta “wazig”. Tambe el a conta cu e tin un yiu adolescente cu di su mes naturaleza y edad ta hayando peishi den cara, y ora tin biento hopi duro cu stof di Sahara acerca, e ta haya grawatamento, su cara ta bira cora y ta haya mas peishi ainda; ademas, tin dianan cu e ta haya un tosamento basta pisa y su wowonan ta basha awa.
Ta interesante tambe pa splica cu durante henter e aña den e Sahara ta wordo forma masanan di aire cayente carga cu particula di santo (arena) di e desierto di Sahara y como resultado cantidad di nubianan di stof ta biaha for di Africa te Europa, Latinoamerica y region di Caribe. Aruba ta wordo hopi afecta pero tambe Republica Dominicana.
E stof di Sahara ta atravesa e Oceano Atlantico prome cu yega Caribe, Centro y Noord America principalmente, y nan a recore un distancia di 10 mil kilometer.
Ta parce cu e nubianan di stof aki ta wordo crea pa motibo di e bientonan fuerte di e region Noord di Africa, y aunke tin su impactonan negativo tambe su parti positivo, por ehemplo cu e ta fertiliza algun area di Amazonas, pero di otro banda e ta reduci e calidad di e aire, cu ta locual ta afecta directamente e personanan cu tin malesanan respiratorio y alergianan, entre otro den cuero.
