OCA a eligi directiva nobo pa 2024-2027

ORANJESTAD (AAN): Dia 21 di Augustus, miembronan di Organizacion Caballista Arubano (OCA) a eligi un directiva nobo pa e termino di 2024 pa 2027.

E directiva aki lo tin un tarea grandi su dilanti, ya cu otro aña OCA ta cumpli su di 40 aniversario y e plan ta pa celebra esaki durante henter e aña. Asina por menciona cu OCA lo tene un exposicion di e movimiento caballista na Aruba, pero tambe ta trahando riba un compilacion di historia oral di cabay y caballista y proximamente lo traha un documentario cu lo ilustra e historia di cabay na Aruba di e tempo pre-colonial te presente. 

            Banda di esaki OCA tin un Master Plan ambicioso cu ta cubri henter e funcionamento y movimiento caballista den un forma detaya. E Master Plan aki a carga aprobacion di e presentenan durante un town hall meeting teni na MFA Paradera, cu a conta cu un grupo masal di caballista.

            E directiva nobo ta forma pa Tom Pietersz como president, Anneline Peterson secretario, Brigitte Werleman tesorero, Jemina Martis vice-presidente y comisarionan ta Etline Tromp, Michael de Cuba y Joshua Bello.

            E fin di siman aki lo tin un competencia local y dia 25,26 y 27 di October OCA lo tin su Interpaso cu un participacion internacional di cabay, pero tambe jinete y amazona.