O’STAD Incubator 2025 ta sostene desaroyo di negoshinan nobo den un ecosistema di innovacion y colaboracion

ORANJESTAD (AAN): Recientemente, Impact Hub Aruba conhuntamente cu Universidad di Aruba, y Camara di Comercio di Aruba a lansa O’STAD Incubator 2025.

   Durante un conferencia di prensa, Directora di Impact Hub Aruba, Señora Mary-Ann Falconi-Rasmijn, a splica cu O’STAD Incubator ta un programa desaroya pa yuda forma startups na Aruba y brinda personanan cu tin un idea pa cuminsa cu un propio negoshi segun un base solido pa transforma un idea pa un modelo di negoshi funcional, competitivo y cla pa mercado di Aruba. Pa companianan cu menos di 5 aña di existencia y cu kier fortifica crecemento na un manera structural y sostenibel tambe por registra pa participa den e programa y sigui fortalece desaroyo empresarial.

   Segun Señora Falconi-Rasmijn, “O’STAD Incubator ta crea un espacio di aprendizahe real, unda bo por evalua, ahusta y amplifica bo idea cu apoyo di mentornan y expertonan local y internacional. O’STAD Incubator ta un experiencia cu ta cambia e manera di pensa, traha y lidera bo compania”,

   Pakico un Incubator: Un incubator ta mas cu un programa di training; e ta un experiencia di crecemento acelera pa negoshinan chikito. Durante e trayecto, enterepreneurs ta haya guia riba formacion di balor, strategia di mercado, financia, y posicionamiento di e compania. Un di e aspectonan mas importante di O’STAD Incubator ta e acceso na mentornan, network y recursonan cu regularmente no ta disponibel pa startups diariamente.

   E benificio di participa den O’STAD Incubator ta inclui mas na 30 session di ‘capacity building’ riba temanan relevante di haci negoshi den un economia moderno. Mentorship di docentenan di Universidad di Aruba, profesionalnan di sector priva, y expertonan internacional lo brinda e conocementonan di mas importante pa startups.

   Lo bay tin un sesion informativo ONLINE 12 di November 2025, 5:30 PM. Pa registra por bishita: https://ostad200.com Despues di registracion, un link di Zoom lo worde manda via email.

Durante e conferencia di prensa, representante di Universidad di Aruba, Señora Kimberly Kuiperi, a elabora encuanto e rol imporante di Universidad di Aruba pa cu e curriculum como tambe sigura calidad di topiconan cu ta worde ofreci, ta conforme cu standardnan internacional. Universidad di Aruba ta conta cu 2 facultad cu lo ta contribuyendo na e incubator cual ta ‘Financieel Economisch Faculteit’ y ‘Faculty of Hospitality and Tourism Management’.

Un parti esencial di e incubator ta mentorship, di cual Señora Sue-Ellen de Freitas-Sousa representante di Camara di Comercio a elabora. Camara di Comercio ta wak sigur tur aña un aumento di companianan nobo, pues ta mira e necesidad di O’STAD Incubator. E programa tambe ta alinea cu Camara di Comercio su vision pa cu sostene desaroyo di companianan nobo y sigur promove hacimento di negoshi na un manera responsabel y sostenibel.

Durante e periodo di O’STAD Incubator, ademas di ricibi training y mentorship, lo bay tin diferente eventonan di networking. Señora Roxana Semeleer-Ras, Marketing Manager di Setar N.V. ta splica cu pa Setar N.V. ta sumamente importante pa ta conecta cu comunidad como tambe aporta na liderazgo den innovacion riba nos isla. Como compania di telecomunicacion estatal di Aruba, Setar N.V. ta mira e importancia di sigui sostene proyectonan cu ta contribui na un ecosistema di entrepreneurship mas resiliente pa nos isla di Aruba, di cual ta motibo pa di 2 aña consecutivo ta aporta na O’STAD Incubator.

   Mester registra: E registracion pa O’STAD Incubator ta habri te cu 14 di November 2025. Despues, lo tin un pre-seleccion unda 15 startup lo presenta un pitch di 3 minuut pa un comision di seleccion, y 10 lo worde selecciona pa drenta e programa.

   Impact Hub Aruba ta sigui cumpli cu su mision pa crea un espacio den cual Entrepreneurship, Innovacion, y Colaboracion ta uni pa forma un ecosistema fuerte pa crecemento sostenibel na Aruba.

O’STAD Incubator 2025 ta posibel danki na aporte y colaboracion di sponsors oficial: Setar N.V., Aruba Airport Authority, Aruba Tourism Authority, MRZ Media Enterprises, y Growth App.