Directora Kathy Ruiz-Paskel a splica:
ORANJESTAD (AAN) – Señora Kathy Ruiz- Paskel, directora di DIMAS, den entrevista cu DIARIO a referi na e hecho cu atrobe tin rij di cliente dilanti entrada di e edificio.
Ruiz-Paskel a splica cu esaki ta un combinacion di aspectonan. Nan a haya personal adicional di e Minister pa loke ta trata peticionnan den cuadro di e proyecto y nan ta sinta patras. Y a haya extra personal cu a wordo sinta dilanti. Nan a haya personal di DPL tanto pa e parti patras como dilanti, y a haya sosten di e ekipo di IOM cu ta e Organizacion Internacional di In
migracion.
“Y riba e vloer por wak diferente fluho di hende yegando. Pues, ta hende cu tin afspraak pa ‘Hunto pa Progreso’, pa Trayecto 4, of 1,2,of 3 cu ta bin DIMAS y nan ta wordo yuda entre 8’or di mainta y 8’or di anochi, plus Diasabra entre di 9’or di mainta pa 3’or di atardi. Plus, tin esnan cu tin peticion y kier haya sa con esaki ta”, señora Kathy Ruiz-Paskel a comenta.
Directora di DIMAS a menciona cu siman pasa nan a duna 73% di tur e peticionnan cu a wordo procesa, y e demas peticionnan tur ta den tramite, sea cu nan falta pago, y e siguiente mes nan a haya un betaalwijze pero no a cumpli cu esaki.
“Nos ta urgi e ora ey tanto esun cu a entrega via e portal, pero tambe via 1,2 cu 3, pa na momento cu nan tin nan payment pa haci esaki na un manera mas rapido, pa e proceso por cuminza. Sin e pago, e proceso ta warda. Y nos tin tambe, door di e volumen mes, cantidad di peticion den tramite cu nos ta trahando cu e ekiponan cu mi a menciona”, señora Ruiz-Paskel a señala.
El a agrega cu e cantidad di hende cu por a wak na DIMAS tin di haber tambe cu e cantidad di peticionnan extra cu nan ta hayando, pero tin hende cu tambe ta yega djis pa busca informacion.
“Pues na final di dia, por ta di e cantidad di hendenan presente un parti so ta haci entrega y lo por wak nan un di dos biaha tambe, na momento cu nan lo bin haci nan peticionnan.
