NV Elmar tin 11 station pa recarga auto electrico y tin den plan instala mas

Rachel Kraaijvanger, Customer Relationship Manager ta splica:

ORANJESTAD (AAN) – Den un entrevista cu DIARIO, Rachel Kraaijvanger, Customer Relationship Manager, na Compania NV Elmar, ta elabora tocante e meta cu e compania tin, pa pone mas stacion di coriente pa autonan electrico.

            Kraaijvanger a comenta cu henter e filosofia di gobierno y di pueblo di Aruba ta pa na 2030 tin mas vehiculo electrico, y banda di esey NV Elmar tambe ta hunga un rol hopi importante den esey, y mientras tanto e compania tin 11 station eyfo pa e personanan cu tin un vehiculo electrico por recarga esaki.

            E dama a agrega cu cada vez por mira mas animo cerca esnan cu ta cumprando auto electrico, y cu ta bin busca informacion cerca NV Elmar, y nan ta aplica pa e Avergo app, y asina nan tin acceso na tur e 11 localidadnan.

            “Nos no ta bay tin’e na 11. Nos ta expandiendo mas y mas y probablemente e aña aki lo bin un of dos charger publico mas. Nos ta trahando duro riba nos charger publico na nos edificio di Hato, unda lo bin un ‘level three charging’ y nos tin un plan masha bunita pa eynan tambe durante e aña aki”, Rachel Kraaijvanger a duna di conoce.

            El a agrega cu como un luna pasa, NV Elmar a firma cu un compania cu ta haciendo un pilot pa su flip management. Eynan poco, poco NV Elmar ta lanzando mas y mas y ya tin varios compania cu a acerca nan, pa nan flip management. “Pasobra hopi compania kier bay totalmente ‘green’ of bay riba vehiculonan electrico, y p’esey ELMAR tin full un sistema in place”, Kraaijvanger a splica.

Tin plan pa NV Elmar sinta na mesa cu companianan cu ta bende autonan electrico, pa dialoga cu nan, pa brainstorm cu nan.

            NV Elmar tambe por duna guia na personanan cu ta cumprando auto electrico tocante cuanto nan por charge y na Servicio pa Cliente por acerca pa mas informacion.

            Actualmente, e compania ta usando nivel 2 y nivel 3. E nivel 3 ta mas lihe. “Pensa riba un taxista cu ta core hopi y mester charge den 15 minuut. Nivel 3 no solamente ta e aparato di mas caro y no tur ora recomendable pa charge nivel tres pa e bateria, principalmente. Pues, mayoria di nos chargers ta nivel 2”, Rachel a menciona.

            El a reitera cu NV Elmar ta trahando duro, y tin un team dedica na esaki y nan ta reuni regularmente, pa scucha ideanan kico e clientenan tambe ta desea, p’ asina por complace nan, y yuda e mercado eyfo mas cu nan por, Rachel Kraaijvanger a subraya.