Motociclista herida den accident riba Caya Nelson Sprok

ORANJESTAD (AAN): Alrededor di 5’or di atardi, Central di Polis a ricibi informacion cu net na e T-weg pazuid di Centro Hubenil Washington un accident a socede entre auto y motorcycle.

   E prome unidad di Polis cu a yega ta uno motoriza, y a bin ripara cu e accident ta entre un motorcycle y un auto compacto Toyota Vitz riba Caya Nelson Sprok.  A haya e motociclista abao benta dilanti e cas Washington 6-B.  El a constata cu e ta herida, pero no di gravedad. Toch a pidi presencia di Ambulans, debi cu e tin dolor.

   E informe ta mustra cu e motorcycle ta bayendo panort riba Caya Nelson Sprok, y net na e T-weg aki e Toyota Vitz color blanco cu number A-47216 a sali su dilanti.

   Mas unidad di Polis a yega pa asina cera e caminda, di e forma aki por a atende e accident. Ora cu Ambulans a yega, Paramediconan a controla y a opta pa bay cu e hoben pa Servicio di Emergencia na Hospital, mirando cu e tabata keha di dolor altura di su heup.  Forensys a yega tambe pa atende e accident.