ORANJESTAD (AAN): Minister Geoffrey Wever tabata den Parlamento diaranson unda el a presenta e maneho di negoshi nobo.
El a bisa cu a traha hopi largo riba esaki. Ora cu el a bira minister su intencion tabata pa bin cu esaki den 6 luna, pero el a tuma mas tempo, a señala.
Den un aña a logra revisa e maneho di negoshi y haci'e full moderno, digital. A elimina diferente rekisito innecesario, haci'e mas facil pa haci negoshi. Por ehempel, e cliente ya no mester di bay busca su papelnan na Camara di Comercio of bay Censo ya cu tur esaki ta bay automaticamente, Wever a indica.
E cliente awor por te hasta monitor su permiso y haya notificacionnan. Asina tambe ta purba di elimina e 'red tape' y haci e proceso mas facil pa e comerciante. Reduci 'red tape' ta algo den tur departamento di Gobierno, a remarca.
Tambe a introduci principionan di sostenibilidad y ta enfoca riba sectornan prometedor pa Oranjestad y San Nicolas pa asina amplia e posibilidad pa inversionnan di afo. Kier stimula inversionnan pasobra ta mira cu den e ultimo 10 anjanan e inversionnan ey no a yega y no por keda haci locual tabata haci y cambia e 'approach' si kier mira un resultado diferente, asina Minister Geoffrey Wever a duna di conoce den entrevista cu DIARIO.
