Notary At Night cu un 'Charla Night' exitoso

Anochi Informativo 'Ban Pariba'

ORANJESTAD (AAN):  Recientemente Oficina di Notaris Helmeyer a tene nan 'Notary At Night', un anochi cu a hiba como thema 'Ban Pariba'. Un Kulture Cafe completamente yen di esnan cu kier a scucha y haya mas informacion for di Notaris Mayrene Marugg- Helmeyer caminda cu a tene un 'Charla Night' cu dos topico interesante.

            For di momento cu a anuncia e Notary At Night lo bai 'Pariba' den e edificio monumental di Kulture Cafe y cu e biaha aki lo hasie den forma di un Charla Night cu dos topico; Start Your Own Company & Sale and Purchase of Real Estate, e registracion a yena mesora. Hopi hende a mustra nan interes pa lanta nan propio negoshi y con Notaris Helmeyer por guia nan den esaki. 

            Esnan presente a haya e oportunidad pa hasi pregunta cu kisas tabata tin duda riba pero tambe a regresa cas carga cu informacion valioso y sigur detaya pa asina start negoshi y continua. Otronan interesa a pidi pa un afspraak mas priva, cual e anochi eynan mes a hasi anotacion. E team completo di Notaris Helmeyer tabata presente pa asina yuda asisti tur esnan cu tabata tin mas pregunta riba otro area den notariaat.

            E idea di Notary At Night a lanta pa duna esnan cu no por yega oficina di Notaris Helmeyer durante dia, pa medio di un afspraak por pasa despues di trabao. Hopi tabata hasi uzo di e oportunidad aki pa buska informacion of te hasta pasa un akte. Un idea sigur inovativo aki na Aruba cu for di su prome edicion nan 2021 a bira popular y mas aun cu e clientenan tabata aprecia e iniciativa aki despues di trabao.

            Notaris Mayrene Marugg- Helmeyer ta sumamente contento y orguyoso di su team completo cu semper ta cla pa yuda y duna e mihor servico posibel cu su oficina ta reconoci pe. Mirando e acohida grandi aki pa e 'Charla Night' e pregunta cu a wordo lansa mesora tabata 'Ki dia e next one lo ta / Kiko lo ta e topiconan'. Notaris Helmeyer lo anuncia esaki pronto pa asina por cuminsa registra na tempo.