Drs. Luenne Gomes-Pieters, Directora di Departamento di Impuesto Aruba
ORANJESTAD (AAN): Den un entrevista recien, Directora di Departamento di Impuesto Aruba (DIMP), Drs. Luenne Gomes-Pieters, a expresa cu kehonan ricibi tocante e tardansa den servicio ta valido. E directora ta indica cu Departamento di Impuesto actualmente tin 7 funcionario publico cu ta atende e contribuyentenan den e departamento di front office. Esaki no ta suficiente pa e fluho di contribuyentenan cu ta drenta pa haya servicio.
Señora Gomes-Pieters a remarca cu e cantidad di contribuyente ta mucho grandi compara cu e funcionarionan cu ta trahando pa duna servicio haciendo cu ora por ehempel un contribuyente manda un email, no necesariamente e ta haya un contesta di biaha riba su peticion. Apesar di esaki, di parti di maneho interno, ta pone hopi enfasis na e servicio na e cliente. E funcionario publico por contesta e cliente via un email bek, gradiciendo e pa su email y ta ofrece cu e lo ser contacta despues.
DIMP, segun señora Gomes-Pieters, a bin ta cambia e cultura den duna servicio poco poco den e departamento. Ta rekeri un cambio grandi den pensamento. Den gobierno no ta bende producto sino ta duna servicio por lo tanto servicio publico mester eleva riba e servicio cu ya ta brindando. “Nos a haci stapnan grandi pa yega caminda nos ta pero ainda falta”.
Pa por acapara e situacion y alivia e kehonan, Departamento di Impuesto a cuminsa cu un programa di capacitacion. Un grupo grandi di funcionarionan publico actualmente ta den e opleiding aki pa asina por acapara e gapnan cu tin den funcionarionan publico. Di e manera aki por yena internamente vacuturanan pa asina tambe duna servicio mas eleva, especialmente na front office cu ta e funcion cu ta e prome contacto cu cliente.
Tin varios opleiding cu ta tumando luga entre otro BOB, Basis Opleiding Belasting. Den e opleiding aki, funcionarionan ta haya training riba leynan fiscal na unda nan ta mas ekipa pa yuda contribuyentenan y brinda informacionnan mucho mas detaya na telefon of personal.
E di dos opleiding ta e Kommies Opleiding Invordering. Esaki ta un opleiding hopi amplio, no solamente tecnico pero cu ta duna e capacitacion riba otro tereno pa nan por haci nan trabou mas miho. Entre otro, ta haya Hulandes, con pa skirbi carta y email.
Tambe ta siña di ‘soft skills’ pa ekipa funcionarionan cu e conocemento con pa controla emocionnan pa por duna informacionnan necesario na clientenan cu no ta mucho contento cu cobransanan di impuesto.
“Ora cu e opleidingnan caba, nos ta sigur cu lo mira un adelanto den e servicionan cu ta brinda cliente y e kehonan lo bira menos”, Directora Luenne Gomes-Pieters a expresa.
