Minister di Enseñanza Gerlien Croes:
ORANJESTAD (AAN) Minister di Enseñanza, Gerlien Croes, a sigui reitera den entrevista cu Matutino DIARIO, cu tin hopi structuracion y control debido tambe, cu mester tuma lugar.
“Aworaki nos ta purba wak, traha un lista di e gastonan cu ta wordo haci den material di enseñanza y si di tur ta haci uso di dje, nos ta ocupa cu varios cos y mi lo comparti esaki cu pueblo tambe. Mi ta sinti cu nos tin caminda, no pa corta, pero pa haci miho uso di e fondonan. Tambe mi ta ripara cu oposicion ta hiba un retorica cu nos ta corta den onderwijs; nos no a corta, nos no a baha ningun presupuesto”, e mandatario a bisa.
El a splica cu loke nan a haci ta transferi fondo, unda tabata posible, di un lugar pa otro, sin cu a duna un impacto negativo den e veld mes.
“Pero mi ta sinti cu tin caminda pa organiza nos mes miho. Mi no ta yame ‘besparing’ pero nos por uza fondonan na un forma miho destina, y esey nos ta bezig cu ne”, Minister Gerlien Croes a subraya.
