CPI di Juli a cay cu 0.2%
ORANJESTAD (AAN): E ta conoci como ‘CPI’ y na Papiamento e ta worde referi como Indice di Prijs di Consumo. Siman a habri y Oficina Central di Estadistica (CBS) na Aruba a divulga cu e CPI pa luna di Juli 2025 ta 109.12, loke ta representa un caida di 0.2% compara cu e indice di Juni 2025 (109.39).
E cambio di e CPI pa e ultimo diesdos lunanan (Juli 2024 te cu Juli 2025) ta -0.1%, un caida di 2.9 punto di porcentahe (ppt) compara cu e periodo corespondiente di aña pasa (2.8%).
E promedio anual (ultimo 24 luna) di e tasa di inflacion pa e periodonan di Juli 2022 te cu Juli 2023 y Juli 2024 te cu Juli 2025 ta 0.7%, un caida di 1.1 ppt compara cu e 1.8% registra den e periodonan di Juli 2021 te cu Juli 2022 y Juli 2023 te cu Juli 2024.
E caidanan aki a wordo contraresta parcialmente door di principalmente un subida den e indice di e sector di “Transporte” (0.8%) cu a contribui cu un efecto di 0.10 ppt riba e CPI di Juli 2025.
E subidanan den e sectornan restante a contribui cu un efecto di 0.07 ppt riba e CPI di Juli 2025. E caida den e sector di “Paña y sapato” a wordo causa principalmente door di un caida di 5.7% den e categoria “Paña”, causando un efecto di -0.10 ppt. E caida den e sector di “Mobilario” a wordo causa principalmente door di un caida den e categoria “Aparato pa uso domestico” (-6.6%), causando un efecto di -0.16 ppt. E caida den e sector di “Vivienda” a wordo causa door di un caida di 1.9% den e categoria “Mantencion y reparacion di vivienda”, causando un efecto di -0.11 ppt.
E subida den e sector di “Transporte” a wordo causa door di un subida den e categoria “Gasto relaciona cu uso di vehiculo di transporte personal” (1.6%), causando un efecto di 0.13 ppt.
Canasta di consumo: E canasta di consumo di e CPI ta consisti di 408 bienes y servicionan. Compara cu Juni 2025, 42.6% di e bienes y servicionan aki a conoce un aumento di prijs causando un efecto di 0.59 ppt, mientras cu 40.7% ta mustra un caida di prijs, cu a contribui cu un efecto di -0.83 ppt y pa e restante 16.7% no tabata tin cambio den prijs. Compara cu Juni 2025, prijsnan di bienes (-0.6%) a conoce un caida y a causa un efecto di -0.34 ppt, mientras cu prijsnan di servicionan (0.2%) a registra un subida y a contribui cu un efecto di 0.09 ppt riba e CPI di Juli 2025.
Core inflation: E asina yama CPIC conoci como ‘core inflation’ (CPI excluyendo e efecto di energia y
Cuminda), a registra na Juli 2025 un subida di 1.7%. E indice di energia - cu ta consisti di e productonan: electricidad, awa, gasolin y diesel - a registra un caida di 3.8%. E indice di cuminda a registra un subida di 1.2%.
