Den su trayectoria di 55 aña como fotografo:
ORANJESTAD (AAN): Den cuadro di su trayectoria di 55 aña como fotografo, Hubert Luis Tiel a sigui conta nos, cu normalmente e ta un persona hopi dedica na motorsport. “Pero mi tabatin hopi contratempo cu ne, pasobra mi sa kico mi ta buscando, ami sa e shot cu mi ta buscando. Anto na Palo Marga, por ehemplo, mi a haya problema cu e grupo e tempo ey cu ta bin manera ‘hala bo orea’ cu bo no por para aki, no por para eynan.
Mi a saca potret na Merca, varios caminda; dus, bo sa unda bo limit ta, y kico ta e angulo cu bo ta buscando, pasobra bo no kier tin algo mescos cu tur hende.
Mi ta corda, te hasta, tabata tin un biaha cu nan a hala mi atencion pasobra mi tabata usando flash. ‘Oh, bo ta stroba e driver”. No, mi no a stroba e driver ningun rato. E cosnan cu bo a siña tabata tey, pero bo no a stroba e driver, pero si bo a haya bunita potret. Pasobra bo ta haya potret di e auto completo, anto bo ta wak e driver den dje, cu ta haciendo su trabao.
“Aparte di esey mi a siña hopi hende eyriba, riba Palo Marga, con pa busca e miho shot. Awendia bo ta haya poco persona cu ta traha eyriba, wow! Bo wak nan shots, bo ta bisa ‘hopi bunita, hopi bunita mes!”
Mi ta bisa, Motorsport tabata mi pasion mas grandi. Pero aparte di esey, mi tabata tey pa siña tur loke ta accidente, tur loke pasa rond tur dia, mi tabata bezig busca un manera di tin e miho angulo, e miho shot, e tempo ey mi no tabata traha cu DIARIO ainda, pero Jossy (dfm) tabata paga pa front page exclusivo. E tabata paga bo algo bon pe, dus bo tabata zorg pa tin bunita y bon potret, y exclusividad”, Hubert a relata.
