‘Nos adultonan mayor ta un parti esencial di un sociedad sostenibel y humano’

Minister Wyatt-Ras durante firmamento di cooperacion:

ORANJESTAD (AAN): Directie Ouderenzaken (DOZ) y Departamento di Agricultura, Cria y Pesca (Santa Rosa), den presencia di Minister di Salubridad, Asuntonan Social, Cuido di Adulto Mayor y Maneho di Adiccion, señora Melvin Wyatt-Ras y Minister di Finansa, Asunto Economico y Sector Primario, sr. Geoffrey Wever, a firma un acuerdo di cooperacion pa uni forsa pa promove bienestar di adultonan mayor na Aruba.

   E acuerdo di cooperacion tin como meta pa amplia participacion activo di adultonan mayor den sociedad, y fortifica e lazo intergeneracional, pa asina e sabiduria, experiencia y balornan cultural di nos grandinan keda bibo den comunidad y sigui inspira e futuro di nos pais.

   Minister Wyatt-Ras a enfatisa cu e acuerdo ta representa un paso importante den e promocion di un estilo di bida activo y inclusivo pa e grupo di adulto mayor.

   E cooperacion aki ta habri caminda pa iniciativanan cu ta stimula actividad, alegria y sentido di comunidad.

    "Nos adultonan mayor tin conocemento y experiencia balioso cu ta fortifica nos sociedad. Nan a traha duro pa forma nos pais, y nan merece biba un bida digno den un comunidad inclusivo, sostenibel y humano."

   Pa medio di e acuerdo, DOZ y Santa Rosa lo colabora riba diferente proyectonan cu ta uni movemento, naturalesa y comunidad. Entre esnan den desaroyo tin: (*) Fiesta den Hardin: un actividad anual y inclusivo pa adultonan mayor na Santa Rosa, caminda alegria, naturalesa y encuentro social ta central. (*) Hardin rond di casnan di cuido: pa crea un ambiente trankil, agradabel y saludabel na casnan di cuido, caminda adultonan mayor por ta activo y relaha den contacto cu naturalesa. (*) Proyecto di pesca pa adultonan mayor y hobennan: pa uni generacionnan pa preserva tradicion y conocemento local di piscamento.

  E acuerdo di cooperacion ta reforsa e colaboracion entre gobierno, institucionnan y comunidad pa promove bienestar social y salubridad — pa un Aruba mas fuerte, mas saludabel y mas humano.