ORANJESTAD (AAN): Tanto Aruba Fair Trade Authority (AFTA) y Regulatory Authority Curaçao (RAC) a
firma un protocol di cooperacion pa uni forza den e supervision di suministro di awa y electricidad.
Cu e protocol aki, ambos organizacion regulador ta bay di acuerdo pa colabora mas estrechamente via di intercambio di conocemento, informacion, y experiencia. Tambe a logra acuerdonan encuanto training hunto, coremento di stage na trabao, y tene reunionnan periodicamente. E meta di tur esaki ta pa reforza e calidad y eficacia di e supervision na ambos pais.
“Door di comparti nos experiencianan y apoya nos mes mutuamente, nos por responde miho riba e retonan cu nos ta confronta den sectornan di energia y servicionan di utilidad,” ta loke Curt Belfor a bisa, kende ta director general di RAC.
Tambe drs. Roly Sint Jago, president di Raad van Bestuur di AFTA, ta enfatiza e importancia di colaboracion: “E acuerdo ta brinda nos e oportunidad di siña uno di e otro, y construi hunto un marco regulatorio stabil y transparente pa Aruba y Curaçao.”
E acuerdo di cooperacion ta uni na e ambicion mas amplio di ambos autoridad di promove e cooperacion reguional y contribui asina na e desaroyo economico sostenibel den e parti Caribense di Reino.
