A incorpora musica di piano den e ambiente di Hospital

ORANJESTAD (AAN): Recientemente Horacio Oduber Hospital oficialmente a inaugura un grandioso piano den HOH su hal principal.

            Durante e inauguracion di e piano aki melodianan espectacular a zona danki na nan talentoso colega Tjerk Koekkoek, Olaf Vroegop cu ta yiu di director Vroegop y tambe invitado special sr. Johnny Scharbaay cu a deleita tur esnan presente cu melodianan di nos dushi cultura.          Segun director di HOH, sr. Jacco Vroegop “nos ta di e pensamento cu un piano lo aumenta e atmosfera na nos Hospital y alabes lo contribui na e bienestar di nos pashentnan y tambe coleganan. Musica tin e abilidad remarcabel pa inspira y eleva bo spirito, reduci ansiedad y crea un sentido di trankilidad y comodidad.”

            Incorporando e piano den e ambiente di HOH ta parti di nos mision na HOH unda ta provee hospitalidad, enfocando no solamente riba tratamento medico, sino tambe e bienestar emocional y psicologico di nos pashentnan, bishitante y coleganan. E ta un forma simpel pero super poderoso pa haci un impacto positivo riba tur cu ta drenta nos portanan diariamente.

            Tambe como Hospital nos ta di pensamento cu pa medio di introduccion di un piano den nos hal principal e lo trece hende hunto. Pashent, bishitante y staff lo por conecta y comparti experiencianan musical den un ambiente ameno. Hospital ta spera cu por encurasha pashent, bishitante y coleganan cu talento musical pa toca e piano grandioso aki y asina nos provee un espacio unda por expresa creatividad y asina aumenta atmosfera na HOH.

            Hunta di Directiva ta desea di gradici di curason e sponsors di Hulanda, esta Columbus Medical y MP Corporation cu a kere di biaha den e idea aki y danki na nan apoyo awe e ta un realidad pa nos tur na HOH y comunidad di Aruba! Y corda bon, e piano ta di nos tur pues sintibo liber pa toca y laga musica resona na HOH!