Dr. Jenny Montiel di Fundacion Alzheimer Aruba - ORANJESTAD (AAN): Diamars 21 di September tabata Dia Mundial di Alzheimer. Jenny Montiel di Fundacion Alzheimer Aruba
a indica cu esaki ta un luna pa concientisa y banda di esaki ta haci estudionan of investigacionnan pa por yega na e lugarnan unda no tin comprension y tin limitacionnan pa e pashentnan cu problemanan neuro-cognitivo.
El a enfatisa cu no tur trastorno cognitivo tin di haber cu Alzheimer. Por menciona otro malesanan manera malesanan cardiovascular, diabetes, hipertension, accidente cerebro-vascular, etc.
Semper mester haci un diferencia, a bisa. Cada un di e malesanan aki tin un tratamento. No por trata un pashent cu Alzheimer mescos cu un pashent cu diabetes. "Mester haci un diferencia, mester haci aclaratorio, mester haci diagnosticonan", a remarca.
Mester haci testnan pa por bisa si ta trata di Alzheimer of ta trata di un otro malesa cu na final por desaroya tambe den Alzheimer, a indica.
Capacitacion, a agrega. Mester capacita e famianan afecta como tambe esnan cu ta brinda cuido. No tur persona cu ta bisa cu nan por cuida un persona cu Alzheimer ta capacita pa haci esaki.
Pa bira un cuidador un persona mester tin un perfil y un formacion humanitario pa por yuda e persona afecta y su famia, Dr. Montiel a señala.
Un bon alimentacion como tambe hidratacion ta importante, a agrega. Un estuodio na Hulanda a demostra cu Vitamina C, D, Omega-3 ta hopi importante pa e tipo di pashentnan aki y pa e poblacion en general.
Fundacion Alzheimer Aruba ta conmemora Dia di Alzheimer cu lecturanan cu ta wordo coordina. Tambe ta organizando algun otro actividad manera pelicula cu lo wordo anuncia e siman aki.
