Doñonan di kiosconan na e markthallen preocupa cu e seguridad di e turista

No tin vak pa turista por para nan auto - * Autonan ta coriendo practicamente riba e turistanan

ORANJESTAD (AAN):  Eddy Croes, propietario di un kiosco ubica na e martkhallen a duna di conoce cu un par di luna pasa, ora cu a drecha e caminda dilanti di e kiosconan, a pone asfalt nobo, cu na final di dia ta danki na e edificio nobo cu tin eytras.

Croes a indica cu toch un algo no a bay bon. A cambia e entrada di e caminda y na lugar di drenta di pariba y yega parkeer cara pabao, awor a bolter esaki cu e entrada pabao y parkeer cara pariba.

El a bisa cu e turistanan cu ta canando dilanti di e martkhallen ta enfrentando e autonan dilanti locual a bira hopi fastioso mes pa e turista cu ta cana bin ariba pasobra e auto ta practicamente su tras.

Eddy Croes ta di opinion cu mester pone drempelnan pa mantene e trafico core mas trankil riba e pida caminda ey pa nan no dal ningun hende of pinta un linea geel caminda cu e auto por pasa despues di e via core bay ariba.

Actualmente, e autonan ta coriendo practicamente riba e turistanan.

Otro aspecto na locual el a referi ta na e problema ora cu awacero ta cay. Normalmente, e rioolnan semper ta geblock, nan no a wordo limpia y esaki ta ocasiona cu ora cu awacero ta cay e awa ta bay te paden di e kiosconan.

E biaha aki, cu a awa a cay, awacero no a cay asina hopi cu e no por a drenta.

Segun Croes, e caminda a keda bunita. Esey ta sigur, pero ta keda un poco dificil pa e turistanan por cana safe.

Otro aspecto ta e problema cu parkinglot. Tin masha tiki lugar pa parkeer y mayoria di auto cu ta para eynan ta A-nummer. E turistanan cu ta yega cu un V-car sino ta haya un lugar pa parkeer nan ta bay y busca un otro lugar pa haci nan compras.

Den e caso aki, si e parkinglot tabata disponibel pa e turistanan para sikiera pa un ora, pa mey ora of 15 minuut. Tur turista lo paga pa parkeer, pero nan ta core bay pasobra no tin parkinglot na Aruba.

Finalmente, el a remarca cu esnan cu ta para eynan ta autonan cu plachi A cu ta para eynan pa bay casino, joyeria of pa bay traha eybanda.