E Coronavirus nobo a entrega e prueba di perdida di balor di hende - *Protesta contra medida pa scapa bida ta refleha e berdad hipocrita - *Inversion den paisnan dictatorial ta marca impotencia di centro di paz
ORANJESTAD(AAN)—Ayera Nacionnan Uni a reuni. E topico di organisacion pa union mundial, tabata “Recovering better for an equitable and sustainable world” cu ta palabranan cu ta describi mes tema cu for di 1981 ta wordo discuti dor di paisnan cu tin problema pa traduci e palabranan aki na nan idioma y haci hende comprende di kico nan ta papia.
Cu mundo mester recupera pa hende por sigui sobrevivi riba e planeta, ta algo cu no por pone na duda. Cu tur politico na mundo tin e tarea pa haci esaki realidad, tur hende mester por comprende.
Ora pone e palabranan aki den cuadro di loke ta realidad di nos planeta, mester conclui cu ilusion di paz mundial a bira manera un paloma cu a perde rumbo.
Pa papia di paz, mester pone hende central. Paz ta nifica cu estado emocional mas importante di hende, cu ta sinti su mes trankil, feliz, relaha den loke e ta experencia.
Topico di noticia cu mundialmente ta tene medionan di comunicacion ocupa, ta marcha di protesta contra medidanan pa scapa bida den e pandemia Covid-19.
Noticia mundial mas importante ta splica e progreso y exito di paisnan dictatorial, cu ta miembro di Nacionnan Uni tambe.
Asina nos a yega directamente na e problema mas serio di Paz Mundial, cu un dia tabata motibo cu mundo a introduci Nacionnan Uni pa asina defende bienestar y bida di hende.
Den tempo moderno ta mas facil pa politiconan rond mundo reuni na New York, sede di Nacionnan Uni y tur fantasia di paz mundial, ya cu constelacion di Nacionnan Uni mes ta splica kico a pasa cu paz mundial.
Den Nacionnan Uni, cu tur su palabranan bunita, ta topa cu nacionnan cu ta trapa riba hende, ta viola tur derecho cu cual un hende ta nace como ser humano.
Sinembargo, accion concreto no por wordo tuma pasobra e violadornan di derecho humano mes ta parti di Nacionnan Uni.
E impotencia di mundo pa alcansa paz, sigur por wordo descubri na paisnan caminda dictadura ta destrui hende pero cu cual tur pais kier tin bon relacion y caminda ciudadanonan di paisnan liber ta haci inversionnan grandi cu nan placa, cu asina directamente ta sostene mas y miho dictadura.
Mientras Nacionnan Uni tabata uni, rond mundo por a tuma nota di protestanan contra medidanan pa sigui permiti Covid-19 mata hende, loke directamente ta indica cu por scrap Dia Internacional di Paz mientras hende mes ta prefera di ocasiona morto di otro basta hende por haci loke cada hende kier.
Na e momento cu Nacionnan Uni tabata hunto pa observa Dia di Paz, cantidad di politiconan di e paisnan tabata mira con por complace intentonan cu ta contra felicidad y bienestar di hende.
Aruba no mester mira mucho leu pa comprende kico nos kier trece dilanti awe. Con por celebra Dia Internacional di Paz, si dilanti porta di Aruba tin un Venezuela cu un dictador cu a destrui su pais y su hendenan y ta un menasa pa su region?
Ta facil pa hisa un bandera blanco y grita “paz”, cu nunca Nacionnan Uni por a haci realidad pa su caracter complaciente contra libertad, democracia, felicidad, bienestar y bida di hende.
E Paloma di Paz a bay sconde mientras mundo ta gasta placa pa su politiconan topa y uza palabranan sin contenido pa un reunion di Nacionnan, di un compleho di organisacionnan cu dirigentenan cu mester representa cantidad di pais, caminda balor di hende a muri!
