ORANJESTAD (AAN): Durante Rueda di Prensa semanal di Gobierno, Minister Glenbert Croes a elabora riba diferente topico. Un di e topiconan cu e mandatario a atende ta Enseñansa pa Empleo y Aruba Kier Traha.
Corectamente manera cu e mandatario a trece padilanti, su maneho laboral cu el a bin ta hibando desde 2017 ta cu nos hendenan local ta e promenan yama pa haya trabou. E maneho aki a conduci na un reduccion substancial di cifranan di desempleo. Lastimamente COVID a yega Aruba cu a causa un caos laboral. Historia di esaki nos tur sa.
Pero mientras tanto Aruba a drenta bek su etapa di recuperacion y hopi cupo di trabou a cuminsa habri bek. Pero e demandanan di funcionnan tambe a conoce un cambio.
Aki ta unda cu Enseñansa pa Empleo y Aruba Kier Traha ta hungando un rol importante den recapacitacion di nos hendenan.
Ta e mandatario su vision pa empuha EPE den un proximo nivel pa por cumpli cu calidad di cursonan conforme demanda di mercado laboral y dunadornan di trabou. E tarifanan lo ta socialisa pasobra e meta ta pa pone nos hendenan local na trabou prome. Mientras tanto por anuncia cu EPE a haya mas di 1400 inscripcion. Pa loke ta Aruba Kier Traha, e di 3 grupo a cuminsa cu e curso exitoso di “Mindset Reset” cu ta wordo ofreci pa Ministerio di Labor pa e grupo cu a keda mas largo riba FASE.
E oportunidad pa por studia pa haci cambionan vocacional, por impulsa desaroyo social tambe, ademas di laboral. Si tempo di bo hubentud bo no a haya e oportunidad pa studia, un centro vocacional manera EPE lo brinda bo e oportunidad pa skirbi un historia propio nobo y percura pa e cambio cu lo desaroya bo futuro den uno miho.
Minister Glenbert Croes basicamente kier pa Enseñansa pa Empleo ta e luga cu lo brinda nos hendenan e posibilidad pa sigui desaroya nan mes, pasobra den bida nunca ta laat. E unico meta ta pa por logra crea bienestar pa nos hendenan. “E motor grandi di recuperacion di e economia di nos pais ta pa percura pa e porvenir y progreso di henter nos digno pueblo trahado”, tabata declaracion di e mandatario.
