For di 2021 DIARIO a prepara Aruba pa e menasa grandi pa Florin --- *Prijs di gasolin na Aruba ta comporta manera DIARIO a anuncia --- *E spiral mas peligroso ta aumento di salario na aumento di prijs
ORANJESTAD (AAN)- Aumento di prijs di productonan petrolero, te awor e combustibelnan principal na Aruba, tin varios motibo.
For di e segundo parti di 2021, DIARIO na un forma continuo a base di desaroyonan mundial, a adverti Aruba cu na 2022 inflacion lo causa un spiral peligroso y mester tene na consideracion cu tur prijs lo aumenta.
Na 2021 ya pronosticonan a wordo adapta pa 2022, cu originalmente mester a bira e aña di stabilisacion despues di Covid-19.
Na prome lugar mundo a pensa cu pa final di 2021 e lo a logra di domina e parti mas severo di Covid-19 y den esaki a comete un eror grandi.
Delta a wordo reemplasa pa Omicron cu mundo no kier a midi for di prome momento na e peligronan grandi cu e tin y mas bien a cualifica como “un griep”.
Mientras Omicron a plama rapidamente el a causa mas hende malo, a paralisa mundo na un forma mas severo, a mata mas hende y a causa impacto serio riba economia y comportacion di hende.
Turismo no a conoce e recuperacion mundial cu a wordo spera mientras mas problema a presenta.
Debi na Covid-19 petroleo a baha como bon negoshi di e companianan petrolero mundial cu na 2021 a cuminsa mira benta aumenta na un momento cu mundo a dicidi di cuminsa papia cu tono mas serio di cambio di clima.
Medidanan pisa mundo kier tuma riba termino cortico y cu lo mishi sigur cu e negoshi di petroleo.
Mientras na Glasgow paisnan tabata reuni pa programa menos gas y petroleo, OPEC a baha su produccion, loke den e de,amda grandi pa petroleo mundialmente a nifica, cu tabata tin menos petroleo pa bende y petroleo a bira mas caro.
Un situacion cu ta continua pasobra dia 2 di Februari, e reunion di OPEC no a deshaci di su plan mientras mundialmente a cuminsa traha riba energia alternativo.
Cu aumento di prijs di petreleo na forma considerabel debi na e produccion di petroleo, otro factornan tambe a hunga un papel.
Instabilidad mundial y sigur e conflicto na Ucraine ta sigui afecta prijs di petroleo.
Mester tene cuenta cu e prijsnan cu ta wordo cobra na Aruba no ta core simultaneamente cu e prijsnan di OPEC, ya cu ta tuma tempo pa productonan move.
E prijs di petroleo a uni na problemanan den produccion di producto cu ta nifica scarcedad di producto rond mundo debi na Covid-19.
Un mercado mundial instabil, cu incertidumbre mundial, aumento di prijsnan di transportacion, prijs di produccion, entre otro, a causa e aumento di gasolin pa cual DIARIO a adverti.
E resultado di aumento di gasolin na Aruba lo nifica, loke DIARIO a anticipa y a splica lectornan. Aumento di prijs pa otro motibo, riba mercado local di Aruba lo bira aumento di costo di bida, cu ta alimenta inflacion.
Aruba mescos cu henter mundo, ta enfrenta e problema mas peligroso den e spiral di inflacion.
Prijsnan ta subi, costo di bida ta subi y trahadornan ta bay exigi mas placa. Aki e trampa mas peligroso pa un spiral ta sconde, pasobra aumento di salario lo provoca aumento di prijs, cu na su turno atrobe lo exigi aumento di salario y asina por sigui.
E spiral aki ta e factor peligroso pa Florin, cu ta perde su balor.
Venezuela ta ehempel di e spiral di inflacion incontrola.
Un tempo sumamente pisa ta spera mundo y asina Aruba cu mester ta debidamente informa pa e por enfrenta un reto sumamente serio, cu den e menasa di guera mundial y incertidumbre di Omicron, ta sigui crece!
