Fiscalista di DIMP, Angeline Geerman:
ORANJESTAD (AAN) – Ta un hecho cu BBO na frontera ta un realidad caba, pero ainda tin hende cu no ta compronde e concepto y tin supermercadonan cu ta aumentando prijs di producto ainda mas, bao capa cu ta door di BBO na Frontera.
DIARIO a hiba un entrevista cu señora Angeline Geerman, Fiscalista na Departamento di Impuesto (DIMP), ken a bolbe splica pakico a introduci e impuesto aki, y con e ta wordo aplica.
Geerman a cuminza pa splica cu BBO na Frontera a wordo introduci, primordialmente, pa atende cu e disturbio cu tin actualmente riba e mercado local. Eigenlijk e ta un proteccion pa e mercado local, el a enfatiza. “Pa crea e ‘Level Playing Field’, cu si bo ta haci bo compra localmente of internacional, bo wordo confronta cu BBO na frontera”, Geerman a indica.
E motibo di esaki ta cu BBO ta un sistema acumulativo (tax and tax) ta pone cu si e persona ta importa directamente di afo e ta spaar 7%, pasobra si cumpra e articulo localmente no tin cu pague.
“Pero unico motibo cu bo ta importa producto ta pasobra e prijs afo ta mas barata. E ora ey, e sentido fiscal e ora ey ta wordo elimina pa proteha nos mercado local. Si bo cumpra di afo of localmente bo ta paga e 7% di BBO na frontera”, Angeline Geerman a señala.
El a agrega cu pa e negociantenan cu ta importa productonan comercial, nan lo haya 100% deduccion riba e productonan cu ta wordo importa, loke ta haci cu nan prijs no mester wordo aumenta, pasobra e mesun BBO cu di 7% cu e tin cu paga, riba volumen di benta, pero parti den dos. Un parti e ta paga na frontera y e otro parti riba e benta. Anto di locual e tin cu paga riba e benta e por deduci’e di locual el a paga na frontera, Geerman a splica.
Kiermen, e peso di impuesto no ta subi pero e ta keda e mesun 7%. Como ehemplo, el a splica cu si un persona ta importa producto na un balor di 4 mil florin, e ta paga 7% na frontera cu ta 280 florin. Si e volumen di benta den e luna ta 6 mil florin, riba e 6 mil e tin cu paga 7% cu ta bira 420, pero di e 420 aki e tin cu paga na final di luna, deduciendo e 280 cu el a paga caba na frontera, pues na final e ta paga 140 florin.
Na total ta e mes 420 florin e persona ta paga e mesun 420 fls. 280 prome y 140 na final.
“Pues e impuesto ta keda 7% riba e volumen di benta, y esey ta hopi bon pa tene cuenta cune. Pues, na mi parecer como fiscalista, no tin ningun motibo fiscal pa e prijs di productonan comercial wordo aumenta”, señora Angeline Geerman a reitera.
