Tuberia desea lo a dura demasiado pa yega Aruba
ORANJESTAD (AAN): Manera cu DIARIO a publica caba na forma extenso na final di luna di Juni, e trabao riba e caminda di Palm Beach, net dilanti Citgo Palm Beach y Bingo Café a topa situacion fuera di control ora di renoba e baki grandi bao di e caminda cu ta yuda guia awa di riolering.
Manera DIARIO a splica, tabata momento cu e contratista a bay pa traha riba e asina yama ‘bakprofiel’ cu ta cruza e caminda, a bin topa cu varios sorpresa.
E ‘bakprofiel’ tin di wordo modifica pa asina amplia e capacidad di carga deshaci di mas awa den e zona.
Ora di a inspecciona e bakprofiel existente a constata cu esaki ta den un estado deteriora door cu e beton a putri, y DOW mester laga a drecha esaki tambe. Pasobra no tabata responsabel pa laga e baki ey keda asina bao di tera. E extra trabao aki a nifica cu e proyecto lo tuma mas tempo.
Pa acelera e trabao, DOW mester a diseña un otro solucion pa e trabaonan por sigui. A prepara mapanan nobo pa e contratista unda cu lo kita e tapadera di e bakprofiel existente y pone 5 tubo di 800 mm den diameter envez di traha e bakprofiel di nobo den beton-reforza basha. Esaki a reduci tambe e tempo pa traha rond di tur e kabelnan di Elmar, Setar y tuberia di WEB cu ta core links y rechts den e caminda.
DOW a busca prijs na Hulanda pa e tubo nan aki worde cumpra cu urgencia. Debi cu tin un asina yama ‘bouwvakantie’ na Hulanda tabata den cuminsa y si no bestel e tubonan di biaha e order lo bay yega Aruba hopi mas laat cu Augustus.
A pidi e contratista pa bestel y paga e tubonan pa nan yega e di dos siman di Augustus na Aruba. Aki e contratista a laga sa cu nan no por paga e tubonan den un tempo asina cortico. E tempo di entrega di e tubo nan lo yega Aruba e ora lo na September pa October! E ora a dicidi pa reemplaza e bakprofiel existente cu un nobo traha di beton.
Di e manera aki tin su retonan cune y lo tuma mas tempo door cu tin hopi kabel y tubo di Elmar, Setar y WEB cu ta core tur dos banda di e caminda. Bon noticia ta cu DOW ta hayando tur e cooperacion di companianan di Utilidad local pa e trabaonan pa e contratista por sigui traha sin haya mas stagnamento.
Mester menciona cu e contratista a haya un carta di aviso cu e trabaonann ta bayendo slow y cu nan tin 6 siman mas pa caba cu e trabao sino e boete clausule lo drenta den vigor. Esey kiermen cu trabaonan di e bakprofiel mester ta cla pa dia 28 di augustus 2023.
Por ultimo mester menciona cu despues cu caba cu e trabaonan di e bakprofiel tin trabaonan di frees y asfalta e caminda tambe.
