Directora di FCVR, señora Esther Broeksema:
ORANJESTAD (AAN): Na final di aña pasa, Fundacion Contra Violencia Relacional (FCVR) a ricibi un sponsorship di Aruba Bank, den cuadro di celebracion di e banco su 100 aña di existencia. Como parti di e proceso di profesionalisacion di FCVR, e fundacion a uza e aporte financiero pa adkiri un aplicacion di case management, cu lo permiti pa registra y analisa data relaciona cu situacionnan di violencia di genero y violencia domestico na Aruba.
Directora di FCVR, señora Esther Broeksema, a splica cu via e aplicacion, e fundacion por registra y midi diferente aspecto relaciona cu violencia. E informacion por wordo procesa den raportnan mensual y pa kwartal, mientras cu na final di aña FCVR por compila e data pa haya un miho bista di e desaroyonan y tendencianan cu ta presenta.
Broeksema a indica cu e informacion cu FCVR ta observa ta motibo di preocupacion, ya cu e cantidad di casonan di violencia domestico y violencia di genero no ta mustrando di ta bahando. Al contrario, segun e, tin indicacion cu e casonan ta aumentando.
Un otro aspecto importante cu FCVR ta observa ta cu violencia domestico y violencia di genero no ta haci distincion entre background, posicion social of edad. Ademas, FCVR ta mira cu tambe entre hobennan tin situacionnan di violencia, algo cu ta subraya e necesidad pa sigui inverti den prevencion y educacion.
“FCVR nunca ta para cu su trabou di educa comunidad, pasobra nos kier preveni mas caso di violencia. P’esey nos ta pone hopi enfasis riba educacion tocante kico ta un relacion sano. E trabou aki no ta limita solamente na nos propio sector social, pero ta inclui tambe nos partnernan den sector publico,” señora Broeksema a remarca.
