Francis Saladin di Comerciantenan Uni Aruba: - ORANJESTAD (AAN) – Den e cuadro di reunionnan relaciona cu formacion di Gabinete Wever-Croes II,
Formador Evelyn Wever-Croes a sigui cu e encuentronan cu mas stakeholders.
Un di e stakeholders di e gremio comercial ta Comerciantenan Uni Aruba (CUA), representa pa Francis Saladin.
Na prome lugar Saladin a gradici Formador pa su invitacion pa asina CUA ta parti di e formacion di gobierno nobo, locual ta un bon oportunidad pa e gremio di comerciantenan aki.
Francis Saladin a splica cu CUA ta un organizacion hoben cu na Juli aña pasa a wordo lanta oficialmente, aunke nan tin dos aña caba uni.
El a bisa cu nan a comenta na Formador cu nan no tey pa bringa Gobierno, sino pa comparti nan ideanan y conocemento cu gobierno pa yuda den e situacion, vooral mirando e situacion financiero cu nos pais ta den, pa motibo di Covid-19.
E ta haya cu ta hopi importante pa gobierno inclui tur su partnernan pa asina nan tur contribui y yuda nos pais bay dilanti.
Un di e aspectonan cu nan a trece dilanti den e reunion aki ta tocante carteranan di minister, y a bisa e Formador cu CUA a mira den e gobierno anterior, cu ministerio di economia ta algo cu ta preocupa nan pasobra e ta haya poco atencion.
El a indica cu e minister anterior tabata tin e dos carteranan (finanzas y economia) pero claro, finanzas ta exigi asina hopi, cu CUA kier a wak e cartera di economia den man di un otro minister y hasta si por, combine cu turismo, mirando cu turismo ta Aruba su pilar economico actualmente.
“Tambe nos a menciona e palabra diversificacion cu ta wordo uza hopi, y ta jammer pa wak un Aruba cu antes tabata tin diferente industria, awendia ta practicamente un industria di turismo, so nos tin.
Anto nos ta kere cu gobierno puntra su mes ‘pakico esaki ta y con nos a yega eynan’. Nos ta kere cu esaki ta debi na tur e leynan, of falta di crea un clima atractivo pa turismo, dus leynan laboral, leynan fiscal y tur locual ta e parti di compliance, regulacion, y na final di dia nos ta kere cu si bo crea un clima interesante pa e inversionistanan, mi ta kere cu lo bira mas facil pa diversifica nos economia. No ta solamente uza e palabra diversificacion, pero mester enfoca riba tur loke por crea pa haci atractivo pa bin inversion den e diversificacion”, Francis Saladin a expresa.
Otro punto cu a toca durante e reunion aki ta turismo. Saladin a bisa cu CUA ta contento di wak nos isla bek yen cu turismo, pasobra claramente nos pais ta depende di dje.
“Pero e realidad ta cu nos ta para tras di ATA su pensamento cu ‘high grow low impact’, pues un turismo cu tin un crecemento positivo pero sin tanto impacto. Nos tin di corda semper cu nos producto ta keda semper Aruba y loke nos tin di ofrece; nos hendenan, nos servicio. Pero nos hendenan y nos servicio no lo ta suficiente, si nos no cuida nos baranca stima. Mi ta kere cu cierto aspecto den turismo mester wordo regula, pa asina crea proteccion pa sea nos naturaleza of diferente aspecto cu ta trata e Industria aki”, Francis Saladin a señala.
