Jeffrey Matos, director di Club Kibrahacha:
*Mester haci cambionan den termino corto
ORANJESTAD (AAN) — Jeffrey Matos, director di Club Kibrahacha, den su entrevista cu DIARIO relaciona cu su despedida di e Club, pa asumi un reto nobo den exterior, a splica cu nan a introduci un plan estrategico nobo 2025-2030 y esey ta e trabaonan cu e club ta haciendo actualmente.
“Nos ta kere cu ta hopi importante, pa yuda nos boluntarionan y tur hende cu ta traha cu nos grandinan den un organizacion, y hunto cu otro partnernan na Aruba, pa nos por forma un bloki hopi fuerte pa nos por atende cu e necesidadnan grandi cu tin: nos grandinan!
“Nos meta principal como Kibrahacha ta pa nos grandinan keda socialmente activo, y participa den nos comunidad mas largo y biba na cas mas largo posible”, Matos a señala.
El a relata cu no ta un secreto cu e situacion cu tin, actualmente na Aruba pa cu e servicio den casnan di cuido, ta hopi dificil. Esaki, el a subraya, ta algo cu henter comunidad conoce, hopi a pasa den un experiencia den dje, y no ta algo facil.
“Mi ta kere cu si no haci esfuerzonan grandi pa trece e cambionan necesario riba termino cortico, e situacion aki lo sigui empeora, y bira un situacion hopi dificil pa famianan cu ta pasando den dje. Tin hopi trabao cu a wordo haci, pero tin hopi otro trabaonan cu mester decisionnan cu mester wordo tuma ainda, pa nos por yega na unda nos mester yega”, señor Jeffrey Matos a relata.
