ORANJESTAD (AAN): Un plataforma cu e conocido Sonny Richardson a crea algun tempo pasa, e evento cu yama “We Culture”, cu a sirbi como un trampolin pa promove artistanan local.
“We Culture” ta tuma lugar tur ultimo Diasabra di luna, y e bon noticia ta cu awe Diasabra esaki lo bay ta e di 30 edicion. Sonny Richardson ta contento cu e logro ey.
Richardson hunto cu mas hende a crea e plataforma di We Culture pa asina duna chens na artistanan di comunidad, pa reuni, y publico tambe interactua. E meta principal ta pa e evento aki ‘provoca pensamento’ den comunidad.
E pensamento cu nan ta trata di trece cerca tur hende, ta algo cu ta bay den tur aspecto. E prome sinembargo mester ta pa bo conoce bo mes. Bay profundo pa conoce bo mes, y di eynan bo por saca bo mesun berdad.
Durante e anochi di We Culture, ta pasa documentario di diferente topico di loke comunidad ta bibando estrechamente di dje.
Awe e edicion di We Culture lo bay papia di ‘good governance’. Segun Richardson, pueblo tin di mira un eleccion riba e isla como un sorto di ‘examen’, unda bo ta revisa con e rumbo di e isla a cambia ultimo 4 añanan.
Diasabra lo discuti riba good governance, y nan lo tin e experto local Armand Hessels kende ta bay duna headlines di bon gobernacion, y publico lo interactua cu esey. Hessels ta hopi entusiasma, pasobra esaki ta un topico cu e por papia oranan largo.
We Culture su evento di awe Diasabra 29 di Mei, ta start pa 7:00 pm. Portanan ta habri 6:30 pm. E animo tey pa hiba un bon combersacion, y esaki lo por yuda pa esnan presente wordo informa y por tuma un mihor decision ora di eleccion.
E actividadnan ta gratis semper, y ta tuma lugar na Culture Cafe na e museo di Nicolaas Store, net den curazon di San Nicolas. Mester djis yega y ya bo por participa na e evento di We Culture.
E evento awe lo wordo usa como un chens unico pa discuti di e ultimo 30 pico añanan na Aruba. Si bo pone den aspecto familiar, comparable pa mira con bo famia tabata 30 aña pasa, y kico a cambia awor.
