Rino Hermans di CMO:
ORANJESTAD (AAN): Rino Hermans, Director di Crisis Management Office (CMO) a indica cu e temporada di horcan cu ya caba ta vigente ta spera di no ta manera e ultimo 4 añanan. E ta bay bek na normal cu ta den promedio 16 tormenta di cual 3 por bira horcan.
Hermans a agrega cu no mester worry cu wowo di e horcan, mester worry cu e efectonan rond di e horcan pasobra cualkier yobida fuerte of torencial tin algun bario cu ta bay bao di awa, un par di cas cu ta bira victima di e awacero. Kiermen no ta pasobra e wowo no ta pasa ariba Aruba cu no lo tin efectonan di un horcan na Aruba.
El a agrega cu tur cas na Aruba pa regla mester tin un permiso di construccion, esta un bouw-vergunning. Tin e ley ey. Tin construccionnan cu ta haya e permiso aki, pero despues ta keda amplia cu afdak y e afdak ey ta esun cu ta bula bay kibra cas di bisiña door cu no ta trah'e conforme ley di construccion.
Aruba ta sobre pobla, el a enfatisa. Pa colmo, un hende ta traha un cas, ta lanta un muraya y no ta laga awa bay, a pesar cu ley ta bisa cu tin cu laga awa core. Pero bisiña no ta biba cu bisiña. Nan ta traga muraya cera tur e tereno y asina ta haya e casnan cu ta bira victima di cualkier awacero cu ta pasa rond y asina ta haya algun keho.
Recientemente, tabatin 48 cas cu a bira victima di un awacero. "No ta nornal, pero tin cu siña biba cu otro pasobra awe ami ta victima y mañan abo por ta victima. Ley ta bisa cu bo mester laga un buraco den bo muraya di cura pa awa por haya su caminda pa bay bek lama", Rino Hermans a expresa.
El a sigui bisa cu CMO a dialoga cu DOW, cu en caso cu no ta cumpli cu e reglanan, e ora lo mester bay deal cu e consecuencianan pa scapa bidanan y infrastructura. Pero a yega un momento si pa tur hende ta consciente cu esaki no ta bay drecha y cu ta bay keda bira pio.
Hermans a remarca cu e cambio climatologico ta hungando un rol. Tin cu siña biba cu otro y bira un comunidad uni pa por pasa door di e tormentanan aki cu ta toch agresivo.
