Minister Wendrick Cicilia
ORANJESTAD (AAN): “Producto Aruba su maneho exitoso ta su hendenan.” Ta locual Minister di Turismo mr. Wendrick Cicilia a declara despues di tratamento di e presupuesto di Tourism Product Enhancement Funds (TPEF) den sala di Parlamento diahuebs anochi.
“E capital humano, ta forma e base di e industria di turismo, como tambe nos recursonan natural, nos playanan, e diferente aspectonan cultural cu ta identifica nos isla y ta locual ta duna nos e autenticidad. Tur esaki ta puntonan clave y di importancia pa con ta bay haci uzo di e fondo.”
Den pasado ochenta porciento di e fondo tabata destina pa infrastructura, pero esaki no ta e maneho cu Minister di Turismo mr. Wendrick Cicilia kier continua cu ne. Gabinete AVP-Futuro kier Inverti den formacion di nos hendenan, conservacion di nos naturalesa y maneho di nos beachnan.
Minister Cicilia ta wak bek riba un reunion di Parlamento hopi productivo den cual a aproba e presupuesto di TPEF cu apoyo di mayoria miembro di Parlamento.
