Aldrich Croes su motivacion riba desaroyo di Secrets Hotel:
*No ta tur dia ta presenta un cadena di Hotel di prestigio mundial dispuesto pa inverti
ORANJESTAD (AAN): Aldrich Croes, reconocido personahe den mundo di publicidad y mercadeo na Aruba y propietario di e Radioemisora Hits100FM a duna di conoce e motibo pakico e ta na fabor di e Hotel Secrets na San Nicolas. E ta expresa lo siguiente:
"Apreciabel amigonan, aki mi contesta y motivacion pa a firma pa San Nicolas - E pueblo di San Nicolas pa hopi decada a sacrifica nan calidad di bida y nan salud pa e industria Petrolero y progreso economico di Aruba engeneral. Nan a biba un epoca di prosperidad pero tambe a pasa den un serie di desapunto, soporta multiple crisis y a biba periodonan largo di abandono. Un ciudad cu un tempo tabata un di e mas modernonan y dinamico den Caribe awe ta un ciudad cu cayanan keto, bashi, cu un cantidad di edificio comercial sera.
Sinembargo nunca nan a perde speransa y ta en espera di e siguiente oportunidad. Tin negoshinan cu for di tempo di e di dos Guera Mundial cu San Nicolas a biba dianan di angustia cu atakenan di Alemania riba e tankeronan y refineria, ainda nan ta sigui habri, generando e minimo di entrada pero bibando cu un speransa pa un mihor futuro.
Kisas esaki ta e oportunidad, e momento pa San Nicolas?
No ta tur dia ta presenta un cadena di Hotel di prestigio mundial cu ta dispuesto pa inverti alrededor di 200 Miyon dollar den un propiedad. Nan mester por ta kere den nan producto, kere den nos producto y aprecia y kere den San Nicolas su potential, su pueblo y su edificionan historico Artdeco cu por sirbi di atraccion, entretenimento y experiencia cultural.
Ta berdad cu turistanan di hotelnan all-inclusive ta haya nan camber, cuminda y bebidanan paga, pesey nan ta sali menos pafor di hotel cu otro turistanan di otro modelo di Hotel. Sinembargo nan ta sali si pa conoce e cultura y atraccionnan den e area cerca di nan hotel.
Segun investigacion nan ta gusta guided tours, haci compras di Souvenier, Hicking y bishita sitionan historico y cultural, conoce museonan y galerianan di arte. Wel, San Nicolas pa su cercania y pa su aspecto Historico, Artdeco, Artistico y Cultural y ta un “PERFECT FIT” pa e hotel aki y su huespednan.
Aki mi motivacion basa riba mas di 35 aña di experiencia den Mercadeo y Publicidad.
1) Catalyst; e Hotel aki por bira un Catalyst pa e ciudad y barionan di San Nicolas, pues e por yuda genera actividadnan turistico y economico cu lo trece efectonan positivo pa e comercio di ciudad, trahadornan y e pueblo en general.
2) Ciclo di Fluho di hende; Fuera di un Ciclo di fluho di bishitante durante dia cu San Nicolas por genera via Tours actual y futuro, e Hotel tin e potencial pa genera un di dos Ciclo di fluho di bishitante; di atardi y anochi cu lo stimula e sector di Restaurant y Café’s y Galerianan di Arte y Festival of actividad musical.
3) SNBA por traha den partnership cu e hotel pa establece criterianan y practicanan di eficiencia y sostenibilidad. Por ehempel pa uzo eficiente di awa y energia segun criterianan internacional. Uzo di energia solar y otro fuentenan renobabel y reciclahe di awa y desperdicio.
4) Agricultura moderno; Hunto cu Santa Rosa por stimula Plantacion di Berdura y Fruta Organico cu hobennan di San Nicolas interesa den agricultura moderno, pa asina abastece e Hotel y su huespednan, restaurantnan di San Nicolas y e pueblo di San Nicolas cu berdura y fruta fresco. Tin hopi tereno bashi cu por uza.
5) City guided tours; huespednan di e hotel por wordo invita pa tuma e Tournan aki den San Nicolas uzando vehiclonan electrico of hasta Bicicleta, evita ATV y UTV of vehiculonan hopi grandi y cu ta emiti hopi polucion den stad. Por crea un Parkeo special pa Busnan y otro vehiculonan mas grandi di Tours pa para den e ciudad pa baha nan bishitantenan.
6) E Promenade cu su aceranan hancho ta brinda excelente posibilidad pa restaurant ricibi nan huespednan di e hotel pa un Festival Culinario Caribense tipico di San Nicolas na aire liber. Por haci algun caya mas promenade.
7) Musiconan y artistanan di San Nicolas lo haya mas oportunidad pa presenta y bende nan musica cu actividadnan musical regular den San Nicolas.
8 Casnan bandona; por crea un programa pa trahadornan cu ta desea di bin traha y biba na San Nicolas, pa nan tuma over, huur of cumpra cu incentiva di interes casnan bandona. Por crea concepto multi-rent pa edificionan comercial bira apartamentonan pa hobennan, Colombia tin hopi exito cu esaki den diferente ciudad.
9) Edificionan comercial bandona; Por introduci e concepto “Multi-Tenant business model” of tambe yama "Co-working space" of "Shared Store or office space". Asina e suma di huur por baha ora cu ta comparti espacio cu mas empresario hoben cu nan “Startup”.
10) Mantencion; E doñonan di edificio tin mas seguridad cu nan lo haya huur y balor pa nan eficicio. Nan lo mantene nan edificio mas regular.
11) Por crea di maneho di desperdicio sostenibel pa e Hotel y full e ciudad.
12) Por crea espacionan berde den San Nicolas y rond di San Nicolas pa mehora e calidad di aire y mehora e calidad di bida pa e bishitante y tur ciudadano.
13) E parti di barnan cu lus cora, mi ta compronde cu ta pensando y trahando riba realocacion. Mester bin cu orario special cu nan ta wordo permiti pa nan ta visibel pa ricibi cliente paden di e locacion, manera ta e caso na New Orleans y otro paisnan.
Inspira pa e perseverancia y pasenshi di comerciantenan cu ainda ta sigui habri cu nan negoshi den San Nicolas; Charlies Bar, Esquire Store, La Deseada, De Wit Stores, Botica San Nicolas, Arupro cu su fabrica y productonan Eco-friendly, Nicolas Store, Dragon CD, Neighba Restaurant y otronan cu kisas mi por a lubida, ami kier declara cu ami si ta kere den e oportunidad turistico aki pa San Nicolas.
Lastima cu tin otro proyectonan hotelero andando na e mesun momento aki na otro parti di Aruba. Pero no ta husto si pa San Nicolas bolbe perde un otro oportunidad asina prometedor manera esaki.
Mi ta spera cu por tin comprension pa e puntonan menciona y cu respet pa tur otro opinion mi ta conclui cu un cordial saludo", Croes a finalisa bisando.
