ORANJESTAD (AAN): Durante luna di October venidero, Aruba lo bay cera conoci cu un obra teatral di caliber halto,
cu lo bay keda sigur marca den historia, y cu lo por kizas competi den futuro tambe na festivalnan internacional di teatro.
Un obra teatral cu decór inigualable riba stage di Cas di Cultura, y lo bay combina cu diferente avance tecnologico tambe pa haci e obra “Spirito” bira esun cu tur hende lo bay papia y memoriza como esun di mas grandi di 2023.
E obra ‘Spirito’ lo ta dirigi pa e directora sueco Hilda Hellwig, y den elenco tin Carlos Croes, Faritah Luidens, Jhon Freddy Montoya, Tuesday Irwin y tambe Dimanche Gonzalez.
E actor Carlos Croes a splica cu esaki ta un obra di teatro, unda e mes ta sinti yen orguyo di ta actuando den dje. Un di e motibonan ta cu Aruba a haya un di e mihor directornan teatral di Europa presente y e lo bay dirigi e obra na forma sublime, pesey e tambe ta sigur cu publico local no por perde esaki.
Carlos a corda tur hende cu e obra “Spirito” ta di Henrik Ibsen kende ta wordo considera como “e tata” di teatro moderno, y cu el a skirbi esaki na aña 1881. Pero e tabata un tema cu e tempo ey tabata algo demasiado fuerte pa publico, te cu e storia a bira algo escandaloso.
Pero e ta un storia cu ta trata problemanan cu hendenan tin den tur sociedad. Manera cu e tabata skirbi na 1881 te cu dia di awe, e ta algo actual di problema cu tur hende ta confronta. E trabao di directora Hilda Hellwig pa e actornan ta orguyo grandi di wordo dirigi door di dje, y esey ta un balor cu ta di gran aprecio.
Carlos Croes kier a gradici Vicky Arens di Cas di Cultura cu a trece e obra di e calidad halto aki, y e ta kere cu ta hopi tempo hende no a mira algo asina di gran calidad riba escenario na Aruba.
Fuera di esey, Carlos Croes a menciona cu e logronan aki di Vicky Arends (directora di Cas di Cultura), ta pone corda loke Jean Beaujon tabata haci antes. E ta corda cu Jean Beaujon tabata un di e pioneronan di teatro na Aruba, como cu el a trece teatro di calidad pa e isla. Y e ta mirando cu Vicky ta haciendo mesun cos, y e ta ocupa ta lantando teatro bek na Aruba, treciendo obranan di calidad manera por a nota.
Di awor caba, Carlos Croes ta pronostica cu tur hende cu acudi na e presentacionnan di e obra teatral Spirito di dianan 20 y 21 di October, cu nan lo bay sinti nan mes orguyoso di a presencia esaki.
