ORANJESTAD (AAN) –Luanne Gomes-Pieters, Directora di Departamento di Impuesto a splica cual ta e condicionnan pa e pago parcial di impuesto.
1: Lo mester haci e pago adelanta, kiermen prome cu 31 di Januari 2024. 2023 mester ta completamente paga.
2: Ta haci e pago pa luna
3: Ta paga e suma minimo rekeri. “Nos tin un suma minimo di 50 florin of 200 florin, depende di e categoria di plachi.
Categoria di plachi A, V, MFA, MFV, TR,V, Bus chikito, AG, BR cu GAR, tin un suma minimo di 50 florin pa luna, bus grandi y plachi di number DT, O y TI tin un suma minimo di 200 florin pa luna.
“No por paga menos cu e 50 florin, of menos cu 200 florin, a menos cu e debe restante ta yega na un bedrag mucho menos cu esey. Y tin cu haci e ultimo pago no mas laat cu 31 di Januari 2024”, Gomes- Pieters a indica.
El a agrega cu DIMP ta haci enfasis y ta recomenda e contribuyentenan pa haci pago online, via e sistema deal payment di Aruba Bank, Banco di Caribe, y CMB. CMB tambe a wordo añadi na e plataforma unda e pagonan online haci riba un dia ta drenta pa su mañan anochi den DIMP su sistema. “Pa e wordo procesa debidamente, nos ta bisa semper pa inclui e persons number na cual e vehiculo ta registra, e number di auto, e periodo di cuenta cu ta pagando, por ehemplo si ta Januari te cu Juni 2024. Tambe nan por pidi un recibo online cerca nos si ta haci uso di e pago parcial, y nos ta recomenda pa haci esaki despues cu ta completa full e pago, pa pidi e recibo tambe online”, Gomes-Pieters a splica.
Por acudi na e MFA nan y na Post Aruba na San Nicolas pa haci pago, el a agrega y a señala cu nan ta cera ainda na Camacuri, door cu mantencion di e edificio ta tumando lugar. Nan ta reemplazando e glasnan riba e dak, y tabata tin algun contratempo cu e contratista a haya su mes cune, cu a haci cu DIMP no por a habri mas trempan. E ta spera cu lo keda cla mas pronto posible pasobra tin contribuyentenan cu ta sinti falta di yega na DIMP su oficina principal. “Pero si nos tin un caminda unda antes tabata busca e plachi number, nos tin un locket, un oficina habri eynan, nos contribuyentenan por acudi eynan tambe pa haci pago di impuesto. E fecha final ta 31 Januari 2024” Directora di DIMP Luenne Gomes-Pieters a conclui.
