Prome Minister Wever-Croes: "Ta evaluando e siguiente pasonan"
ORANJESTAD (AAN): Prome Minister Evelyn Wever-Croes a tene un conferencia di prensa di Gobierno dialuna mainta unda el a duna un resumen riba e cifranan di Covid indicando cu esaki ta bayendo halto atrobe.
Aruba actualmente a pasa 200 caso activo, algo cu, Prome Minister a enfatisa, ta hiba hopi preocupacion di Gobierno.
“Nos ta evaluando kico ta bay bira e siguiente pasonan cu lo mester tuma. Loke tin nos awor trankilisa ta e hecho cu hospital su capacidad ta bou control. Semper nos a benchmark nos mes riba e capacidad di hospital. Es decir si hospital tin suficiente capacidad pa por acapara pashentnan di Covid riba sala y den cuido intensivo, e ora nos no tin mester di pone medidanan severo.
Pero si e capacidad ta yen pa motibo cu tin otro hendenan cu a drenta cuido intensivo door di acidente di auto of otro situacionnan y e capacidad ta poco e ora nos mester tuma medidanan severo irespecto cuanto caso tin.
E siman aki nos ta evaluando cua ta e medidanan cu nos mester pone si en caso mester bin medida pa asina purba frena esaki”, Prome Minister a duna di conoce.
Prome Minister Evelyn Wever-Croes ta urgi henter e pueblo di Aruba, mirando e cifranan aki, pa reconsidera kico cada ciudadano ta haci den su tempo liber. Reconsidera sali den hopi hende, sali bay fiesta etc.
“Gobierno no ta bezig ta cuidando abo y bo famia. Gobierno awo ta conta cu abo mes por cuida bo mes y bo famia y hopi miho cu gobierno mes. Cuida bo mes, cuida bo famia pasobra bo ta stima bo mes y bo ta stima bo famia”, Prome Minister a enfatisa.
