E culminacion di caso Avestruz tabata conoci for di 2020 den turbulencia - *Den secreto forsanan tabata uni pa un coalicion diferente pa Aruba
ORANJESTAD (AAN) — E regreso di Wever-Croes no tabata loke un grupo cu a keda secreto na Aruba, tabata tin na bista. Informantenan clave ta indica na DIARIO cu nan ta contento cu Evelyn Wever-Croes a dicidi pa formacion di un Gabinete nobo riba un base sumamente hancho cu participacion di tur sector, cu ta cera un epoca di informacion cu lo tabata sumamente dificil.
“Aruba tabata completamente ocupa cu e crisis mundial di e pandemia. E acuerdo cu a wordo logra dor di Evelyn Wever-Croes cu Hulanda a evita hopi suceso cu lo a tuma luga mientras na Aruba un caida di Gobierno Wever-Croes tabata wordo prepara.”
Esaki ta informacion clave cu DIARIO a ricibi di informantenan cu a bisa cu e resultadonan di eleccion no tabata loke cierto grupo(nan) a spera na 2020.
“For di 2020 tabata tin contacto entre diferente personanan cu tabata sinti nan mes yama pa ta den politica of ta den politica,” a wordo splica na DIARIO.
Tabata wordo papia di diferente partido cu lo mester a mira luz cu diferente persona y cu lo mester a yega na palabracionnan pa forma un coalicion nobo cu un base diferente for di loke awe ta na mando na Aruba.
Informantenan a indica na DIARIO cu for di 2019 tabata conoci cu cualkier momento e caso di Benny Sevinger, caso Avestruz, lo a rementa.
“No tabata e intencion pa permiti Gobierno Wever-Croes yega eleccion September 2021 y tabata tin contacto entre personanan cu lazonan cu cierto partidonan pa por a crea caida di Gobierno Wever-Croes prome cu e fecha di eleccion,” a wordo mustra.
Lo tabata tin cierto personanan sumamente interesa den introduccion di partido nobo na Aruba y tin cu a sirbi como drempel pa yega na e partidonan aki pa asina alcansa un coalicion cu por a haya su mes den cierto lazonan cu cierto gruponan manera a wordo trece dilanti.
For di momento cu Aruba a bay sostene lista, tabata bisto cu tabata tin partido cu a haya sosten cu hamas nan lo por a haya riba nan mes pa por a firma lista. Pero nan a haya e sosten aki cu yudansa di personanan cu no kier a mira un segundo Gobierno Wever-Croes.
Manera a wordo indica, Gobernador a sigui e caminda corecto pa apunta un Informador cu no ta di mundo politico y Formador Wever-Croes a sigui e caminda corecto pa e traha e programa di Gobierno cu un base cu ta wordo carga dor di tur sector di comunidad.
Informantenan ta di opinion cu e gobierno forma dor di MEP y Raiz, mester mantene e contactonan aki ya cu ainda turbulencia no a termina.
“E lugar bachi di Benny Sevinger den Parlamento ta duna tur indicacion. Tin e caso di Refineria di Aruba den man di autoridad mientras Paul Croes a apela su caso. Casonan pisa den mundo politico cu na mes momento ta tuma nota cu no tabata tin un union den personanan cu a forma partidonan chikito,” informantenan a trece dilanti.
Nan ta sigura cu tin un coalicion cu mester a wordo forma na 2020, cu a conoce desaroyonan politico fuerte, na cual dor di pandemia Aruba no a presta atencion debido.
