DIARIO semper tabata contra proyectonan sin necesidad di Bo Aruba - *Comercio a adverti y ta sufri di e resultadonan di proyecto contra comercio
ORANJESTAD (AAN) — E hecho cu DIARIO ta opone e forma cu placa a wordo gasta den e proyectonan Bo Aruba, no ta basa riba ayera ni awor.
Ta sumamente lamentabel cu na diferente ocasion ta wordo haci, como sifuera e base di Jossy Mehsen Mansur a wordo cambia dor di DIARIO cu mester sostene loke ta bon y e personanan cu ta tras di loke ta bon y bay contra loke no ta bon y e personanan cu ta tras di loke no ta bon.
Na un forma abierto pero tambe personal, Jossy Mehsen Mansur kende ta fundador di DIARIO y a dirigi DIARIO como matutino di Aruba pa defende interes directo di e Arubiano, a presenta su punto di bista riba proyectonan manera tram, fietspad y gastamento di placa di Pueblo cu mester a wordo tene na bista.
Editorialnan skirbi pa Jossy Mansur, a atende cu e topiconan aki y a wordo mustra cu sigur e tram y e fietspad por ehempel, no ta coresponde cu e realidad di Aruba y hasta e bienestar di e pais.
DIARIO a sigui e mes caminda cu su fundador Jossy Mansur, kende ya tabata sufri di e problemanan di salud cu lo a conduci na e hecho cu el a despedi pa semper.
Na un forma directo Jossy Mansur a atende e asunto di tram cu Mike Eman, kende no a keda contento ora den un conversacion personal Jossy Mansur a splica cu e no tabata di acuerdo cu e tram.
E reaccion di Mike Eman riba e palabranan di Jossy Mansur tabata uno furioso contra Jossy Mansur, cu awe ta sigui haya razon.
E tram ta prueba di un proyecto cu ta contra e costumbernan y tradicionnan di e Arubiano cu tabata tin e centro comercial como su luga pa topa.
Caya grandi tabata wordo frecuenta dor di Arubianonan cu tabata core den e caya yena cu clientenan den un situacion ameno. Esaki a genera semper entrada pa e negoshinan na Playa y sigur Caya Grandi manera Mike Eman a wordo adverti for di e prome momento.
Awe DIARIO ta mantene su punto di bista riba proyectonan, cu mester ta di acuerdo cu e capacidad financiero di un Pueblo, cu costumbernan di e Pueblo y interes di e Pueblo y di tur sector di e pais.
