Entrante 3 di Februari 2022 --- ORANJESTAD (AAN): Vacunacion ta keda importante, Prome Minister Evelyn Wever-Croes a remarca.
El a laga sa cu a mira cu aworaki e interes pa vacunacion ta birando menos, net na e momentonan cu mas tin mester.
Ta flexibilisando e medidanan cada dos siman y pa loke ta trata e frontera, e medida cu a cambia di no mester test ta conta pa residentenan so. Dentro di dos siman, pa dia 3 di Februari, lo bay conta tambe pa no residente, a bisa.
Pakico ta bay warda un poco? El a indica cu recientemente e siman aki a flexibilisa e maneho di viahe pa no residente y semper ta tene cuenta cu dos siman di periodo di incubacion pa mira con e ta desaroya pa e ora por bolbe cambi'e.
Si 3 di Februari yega y e circumstancianan ta igual di positivo manera nan ta awo y ta flexibilisa e maneho di viahe pa turistanan, e ora ta bay mira cu mas turista completamente vacuna ta bay bin Aruba, e mandatario a enfatisa.
