Cantidad di hende cu ta tumando booster ta abao y DVG kier stimula mas hende pa haci esaki

ORANJESTAD (AAN): Sharline Koolman di DVG Diabierna atardi durante un conferencia di prensa a duna un presentacion riba e situacion di COVID-19 na Aruba.

El a mustra un grafico riba cual por a wak cuanto hende cu si a haya nan booster shot a resulta den hospital.

Koolman a cuminza na bisa cu nunca a wordo bisa cu si bo haya e dos prome vacunanan y tambe e booster cu bo no tin chens pa wordo interna den hospital.

“Nos a mira cu esnan cu si a haya nan booster y toch a wordo interna den hospital ta personanan di 60 plus, pero mayoria no ta haya nan mes rapidamente interna den ICU of ta fayece”, segun Koolman.

El a sigui splica cu nan ta traha diferente tipo di grafico pa compronde mihor con Omicron ta move.

Segun Koolman, no tabata tin turista te ainda cu a bira asina malo cu nan mester a wordo interna den hospital.

Tin casonan si di turista cu net prome cu nan mester a bay bek a test positivo pa Coronavirus y mester a keda Aruba.

“Toch bo ta mira cu e presion di e parti di viahamento no ta asina grandi riba e cuido medico na Aruba”, segun Koolman, kende a bisa cu e booster ta bayendo hopi lento na Aruba, siendo cu tempo di duna e prome y di dos vacuna, tabata tin hopi mas hende tur dia ta bay tuma esaki.

El a splica cu ta lamentable cu e asina tiki hende ta bayendo pa tuma e booster, pasobra aworaki ta e booster ta esun cu ta bay nabo e proteccion, no completamente contra Omicron pero si e ta baha e riesgo.

“Nos kier stimula mas hende cuminza bay tuma e booster pasobra di berdad e ta yuda y sigur ta yuda esnan 60 plus pa no bira hopi malo si nan wordo contagia”, segun Koolman.