ORANJESTAD (AAN): Diabierna atardi durante un conferencia di prensa yama na ultimo ora, Sharline Koolman di Departamento di Salud (DVG) a hiba palabra,
despues cu Prome Minister Evelyn Wever Croes a papia riba e ultimo desaroyonan rond di e medidanan di COVID-19.
Koolman a indica cu pa motibo cu Omicron ta mustra di ta causa menos daño y door di e booster cu ta wordo duna na hende, mundialmente y na Aruba tambe tin menos hospitalizacion.
“Esey a duna Crisis Team y Directie Volksgezondheid e espacio pa haci algun ahuste of adaptacion riba e maneho cu tin actualmente”.
Di esnan cu a wordo hospitaliza e siman aki, mas o menos 93% tabata a causa di Omicron.
E average di tempo cu nan a keda hospital tabata 3 pa 4 dia, mientras cu mas cu mitad no a wordo admiti na hospital cu COVID-19, sino eynan nan a test positivo, segun Koolman.
El a sigui bisa cu afortunadamente pa locual ta ICU tur cos a keda bao di control.
“Un reto cu hospital tin ainda ta pa loke ta e pashentnan cu ainda mester wordo opera y ricibi cierto tratamento”.
Mas tanto di esnan contagia tabata den edad di 18 pa 40 aña, pero ultimamente nos a wak cu tin mas caso di contagio di hendenan riba di 60 aña, segun Koolman.
El a splica tambe cu durante un reunion Diabierna mainta riba e datonan, ta wak cu un persona riba di 60 aña cu no tin e booster ainda tin alrededor di 3 biaha mas chens di keda hospitaliza.
