No por prohibi un hende trece un auto di afo si e ta cumpli cu ley di importacion

Minister di Husticia Arthur Dowers:

• Y si Aduana no tin motivo pa prohibicion 

ORANJESTAD (AAN) Minister di Husticia, mr. Arthur Dowers, a splica den entrevista cu Matutino DIARIO, a bisa, encuanto importacion di productonan pa Aruba, cu esaki ta un proceso hopi mas amplio cu solamente Minister di Husticia.

   E ta referi na importacion di vehiculonan, cu si nan ta cumpli cu e rekisitonan pa wordo importa, kiermen e reglanan stipula pa Douane, nan por wordo importa. No por prohibi un hende trece un auto for di exterior, si Douane no tin motibo di prohibicion.

   “Kiermen, loke mester tuma lugar ta un instruccion mas amplio riba e necesidad di para e importacion di cierto productonan. Pero na e momentonan aki esey no ta un discusion cu ta wordo hiba. Diez aña pasa, mas of menos, nos tabata tin discusion riba importacion di cierto vehiculonan. E tempo ey hopi hende den e comunidad a haya cu mester a laga importa e vehiculonan ey, y nos tur sa e consecuencianan awendia. Sinembargo e tempo ey nos a acepta diferente perspectiva di nos ciudadanonan, y a bira full un problema cu e tipo di autonan ey, cu ta core hopi duro, causa hopi accidente y daño. E tempo ey nos no tabata tin espacio pa para esey”, Minister Dowers a relata.

   El a agrega cu aworaki, si acaso mester prohibi importacion di cierto productonan, mester haci un analisis basta profundo, hunto cu otro departamentonan envolvi y e no ta bira asina facil, segun e dignatario.

   El a agrega cu na Aruba tin un ley cu ta regula e keuring cu e autonan mester cumpli cu ne pa core riba caminda publico, pero esey no ta nifica cu no por tin un step den bo cura ni cu bo no por core cu un step den bo cura. “Por ehempel, den un area manera golf course. Eynan e riesgonan ta hopi menos pa loke ta trafico y bo mes; e ta bao bo mesun responsabilidad.

   Sinembargo, ora bo participa den areanan publico, bo tin cu tene  cuenta cu tur otro participante, y esey ta loke e reglanan cu nos ta circula ta regarda”, e mandatario a señala.

   Minister Dowers a subraya cu no t’asina aki cu den principio, como institucion di husticia tin di dicidi kico un persona ta haci den su tereno priva, pero si ta dicidi kico hende ta haci den trafico, den areanan publico, y esey ta den ley na e momentonan aki.

   “No ta conoci ningun pais cu na e momentonan aki tin prohibi importacion, pero si nan a prohibi e uso di nan despues cu nan tabata uza of cu tabata ilegal, y nan a pasa un ley pa prohibi nan. Cerca nos nan tur ta ilegal”, e mandatario a bisa.