DVG a dicidi pa no spuit mas pa sangura den barionan

Jurette Croes di DVG a confirma

• Pasobra e huma ademas di sangura ta mata otro insectonan polinisado 

ORANJESTAD (AAN) Problema di sangura ta un fuente di molester pa hopi residente na Aruba. Segun señora Jurette Croes di Departamento di Salud Publico (DVG), den un entrevista recien cu DIARIO, e departamento ta sigui monitoria y bishita areanan conoci pa tin hopi problema cu sangura, incluyendo diferente area di mangrove.

   Croes a splica cu den e areanan aki no ta trata di e sangura Aedes aegypti, cu ta e especie responsabel pa transmiti malesanan manera dengue, chikungunya y zika. Sinembargo, e otro tiponan di sangura presente den e areanan aki por causa molester significativo pa e comunidad.

   El a remarca cu Departamento Gele Koorst en Muskieten Bestrijding (GKMB) ta haci nan maximo esfuerso pa uza productonan cu ta natural te na unda cu nan por y ta na alcanse, cuidando asina naturalesa mientras ta alivia problema di sangura pa e habitantenan.

   Segun Croes, proteccion di salud publico ta encera cuido y conservacion di naturalesa. Pa e motibo ey, GKMB no ta spuit mas manera tabata practica den pasado. E metodo ey no solamente ta elimina sangura, sino tambe barbulet y otro insectonan cu ta esencial pa polinisacion di nos naturalesa.

   “Cuido di salud publico mester bay den balance cu naturalesa. DVG ta tuma esaki na cuenta y ta encurasha comunidad pa adresa e problema na su rais: eliminando awa acumula unda sanguranan por reproduci y tambe pa deshaci di artefactonan rond di cas cu por retene awa,” señora Croes a enfatisa.

   DVG ta pidi cooperacion di comunidad, enfatisando cu e forma mas efectivo pa reduci problema di sangura ta preveni nan reproduccion door di mantene cura y ambiente limpi, eliminando recipientenan cu ta acumula awa y reportando situacionnan cu por representa un riesgo pa salud publico.