* Ta urgente pa comunidad haya claridad riba edad di pension
ORANJESTAD (AAN): E representante di SVb y AZV, Edwin Jacobs a indica cu e situacion di e fondo di pension di vehez ta cu si logra recupera na aña 2023 e nivel economico di 2019 ta bay ta logra crea reserva. Pero ya na aña 2029 no ta bay tin suficiente reserva mas pa paga.
Esey ta nifica e ora cu e fondo tin cu bay haci un apelacion riba gobierno pa haya entrada pa paga e pension.
Segun Jacobs, den e acuerdo cu tin cu Hulanda pa loke ta trata e sosten di likides a haci e mencion cu lo bay evalua e aumento di edad di pension na 66 aña.
Ta kere cu ta necesario pa bin un claridad pa comunidad rapidamente riba e parti aki y evalua tambe si tin otro espacio pa otro adaptacionnan pa yega na esey. Pero mirando locual ya caba tin riba e presion di gastonan colectivo riba economia, cualkier otro adaptacion lo encera cu e asegurado tin cu bay paga mas y por encontra resistencia tambe, a remarca.
Edwin Jacobs a expresa cu ta momentonan dificil y ta decisionnan cu no ta facil, pero ta importante pa tin claridad na comunidad pa asina cuminsa prepara pa esakinan tambe.
El a agrega cu prome cu e pandemia e edad tabata subi mitad aña. Tabata drenta mas placa cu gasto. Aña 2019 tabata un tremendo aña pa e fondo di pension. Riba 30 miyon florin di surplus.
E placa ey a pone den un spaarpot. Na 2024, e ta yega 65 aña y e momento ey ta bay cuminsa drenta 1500 hende pa cobra pension y lo fayece un averahe di 700.
A bisa cu 800 hende ta bin acerca cada aña y esey ta pone cu entrante 2024-2025 pa dilanti e gastonan ta bay ta mas hopi cu e entradanan y e momento ey ta bay cuminsa saca placa di e spaarpot.
"Pero si tur biaha bo ta keda saca di bo spaarpot ta yega un dia cu bo spaarpot ta bira bashi. Anto esey ta premira aworaki door di e pandemia. Prome cu e pandemia tabata proyecta pa 2035 y tabata tin tempo pa maneha. Pero e pandemia a come e reserva cu tabata tin te cu 2019", a declara.
Jacobs a enfatisa cu e no por bisa cu esaki tin di haber cu e maneho, pero e realidad ta cu e pandemia e come e placa y cu e spaarpot cu tin ta poco.
