Parlamentario Clifford Heyliger:
ORANJESTAD (AAN) Parlamentario Clifford Heyliger ta trece na atencion di pueblo un serie di preocupacion riba e maneho di proyecto di rioolwaterzuivering (AWSS), segun destaca den un carta di fecha 3 di april 2025 di CAft (College Aruba financieel toezicht). Den e documento ey, CAft ta expresa preocupacion cu, aunke e maneho y mantenimento di e sistema ta wordo pone bou di AWSS, "e gobierno ta sigui ta responsabel final pa e infrastructura vital aki." Esaki ta mustra claramente cu, en caso di problema, no ta AWSS, sino e propio gobierno lo keda señala.
Segun Heyliger, e manera con e gobierno anterior a maneha e proyecto, na luga di enfrenta e desafio y oportunidadnan di forma structural, a opta pa separa e instalacionnan y pone nan bou di un entidad nobo sin suficiente planificacion, sin transparencia y sin un base legal firme. “Nan a core tras di fondonan di turismo pa traha e instalacionnan, pero te dia di awe nos no a mira niun resultado concreto, niun ‘added value’, niun mehora real,” segun Heyliger. “Nan a yega pa tuma hende na servicio, firma un prestamo cu un interes halto, pero e problema mes a keda sin solucion.”
CAft mes ta resalta den su evaluacion cu no tin un mecanismo di control eficaz, loke ta trece consecuencianan serio manera uzo no eficiente di fondo publico. “Esey kiermen cu nos no sa unda e placa ta bay, no tin control, no tin transparencia, y esey ta crea riesgo cu nunca tabata mester,” Heyliger a indica. “Ta tur loke un gobierno no mester ta haciendo, pero e gabinete anterior a sigui cu insistencia.”
Heyliger ta lansa un yamada pa un sesion parlamentario urgente. “Como presidente di comision di energia y companianan estatal, mi ta tuma responsabilidad pa yama tanto e minister como e directiva di Utilities pa bini na parlamento pa duna cuenta y rason. E tema aki ta di gran importancia pa nos pueblo, pa nos salud publico y pa nos turismo. E instalacionnan aki no por keda den man di un grupo cu un record di fayo tras di fayo.”
Segun Heyliger, e tempo a yega pa haci evaluacion serio di e decision di pone AWSS bao di Utilities y pa evalua si esey tabata realmente e caminda corecto. “Tur indicacion ta mustra cu e eleccion aki a pone Aruba den riesgo. Nos pueblo merece claridad, nos pueblo merece responsabilidad,” Heyliger a conclui.
