Dr. Nathalie Kingsale:
*Diagnosis riba salud mental ta hopi amplio
ORANJESTAD (AAN) – Den entrevista cu Matutino DIARIO, Dr. Nathalie Kingsale, di Respaldo, a indica cu nan tin un lista di spera cu ta wordo referi door di dokternan di cas, y den esey nan ta mira aumento di hobennan, cu ta wordo referi.
El a bisa e tempo di nan lista di spera di hobennan si, e no ta largo. “Ta 3 of 4 luna, cu ta un lista di spera basta bon. Pa hende grandi ta un tiki mas largo y esey tin di haber cu nos no ta hayando e personal cu nos mester. Ta hopi dificil pa haya profesionalnan pa bin traha pa un tempo largo, na Aruba. Pero nos ta ketobay trahando y buscando riba esey; nos tin hopi vacatura habri y nos ta haciendo nos best pa yuda cu esey”, Dr. Kingsale a indica.
El a agrega cu nan ta sondeando tur posibilidad hunto cu AZV, entre otro, pa wak kico tur nan por haci pa mehora e aspecto ey.
Ta interesante kico señora Kingsale a splica, ya cu kizas tin cu no ta realiza esaki. El a bisa cu loke ta ansiedad, depresion, psicosis, schizophrenia, ta parti di salud mental. “Salud mental t’asina amplio, e diagnosis cu por duna di salud mental ta masha hopi mes. “Tin hende cu ta bin cerca nos cu problema sikiatrico, vooral cu problema di adiccion, por wak cu tin hende ta wordo referi cerca nos cu problema psico-somatico, pero hopi di e pashentnan cu dokter di cas ta referi ta referencianan cu ta cuadra”, Dr. Kingsale a señala.
El a splica cu dokter di cas tin cu wak e pashent, haci un evaluacion, pa dicidi si ta manda e pashent na Respaldo, cu ta un instancia specialisa, of pa otro institucion.
