ATIA a celebra nan 80 aniversario cu un tremendo anochi pa nan miembronan

Director di ATIA Herrick Henriquez

ORANJESTAD (AAN): Aruba Trade and Industry Association a celebra nan 80 aniversario cu un evento pa nan miembronan y invitadonan na Marriott Grand Ballroom.

Director di ATIA Herrick Henriquez a bisa cu nan ta sumamente contento di por celebra nan aniversario y el a conta cu ATIA a wordo funda dia 18 di juni 1945, y tabata prome gremio comercial na Aruba. ATIA semper nan a bringa pa reformanan y tabata un pilar den tempo cu Aruba a haya su Status Aparte y yuda Gobierno den esaki. ATIA semper ta purba yuda pero tambe ta keda critico di Gobierno. Segun Henriquez, nan ta un 'watchdog' organization y ta keda boga pa reformanan.

Henriquez a agrega cu a pesar cu na Aruba tin varios gremio comercial, tin un ta enfoca riba cierto secto sor, pero ATIA ta keda enfoca riba tur sector y a sigui crece den tur manera, financieramente, den nan reach di hendenan. Hunto cu tur gremio cu ta forma parti di nan directiva, por lo menos un 85% di empleadonan na Aruba ta cay bao di companianan cu ATIA ta representa.

ATIA lo sigui para duro pa reformanan y crea brugnan pa nan miembronan por sigui crece. Nan lo sigui boga pa Gobierno ta un facilitador di proyectonan pa nos comerciantenan. Gobierno mester facilita proyectonan y laga sector priva ehecuta nan. Asina ta engrandece e economia di Aruba y caha di Gobierno tambe ta beneficia di esaki. ATIA lo sigui como un conexion di nan miembronan cu Gobierno y nan lo sigui bringa pa comerciantenan y pa economia di Aruba sigui crece.

Durante e anochi aki, Presidente di ATIA, Danilo Werleman, como tambe Minister di Finansa, Asuntonan Economico y Sector Primario, Geoffrey Wever, a duna un discurso riba importancia y logronan di ATIA. Como oradornan tambe tabata invita Roberto Suarez Santos di International Organization of Employers, Jan Willen van Bokhoven, di Holland House Colombia, y Keynoter speaker, Joni Musabayana di International Labour Organization.

ATIA tambe a organisa un panel cu figuranan local manera Ronald van Trigt di Total Finance; dr. Ryan Peterson di Central Bank; Julie Wever di Fundacion Cas pa Comunidad Arubano y Hose Figaroa di FTA.

Henriquez a probecha pa gradici tur nan miembro y stakeholders y a cera cu e mensahe cu ATIA tey pa keda y lo celebra 80 aña mas.