Premio pa Biblioteca Nacional y Archivo Nacional Aruba ta un reconocimento pa nan liderazgo den cooperacion cultural

ORANJESTAD (AAN):   Manera a keda anuncia, Biblioteca Nacional Aruba (BNA) a ricibi e prestigioso

OCLC ACURIL Award pa “Innovative Cooperation Initiatives in the Caribbean” pa su trabao sobresaliente den e proyecto Coleccion Aruba.

            E premiacion aki ta un reconocimento importante pa e creatividad y e compromiso di e proyecto pa yuda desaroya cooperacion y innovacion den comunidadnan di Caribe.

            E premiacion a wordo entrega na señor drs. Peter Scholing diamars atardi durante e conferencia di ACURIL cu ta tuma lugar e siman aki na Corsou. E obhetivo principal di e premio aki ta pa stimula iniciativanan di cooperacion innovativo cu ta contribui na progreso y union den region Caribense. 

Instituto cu ta lanta patrimonio cultural di Aruba

            BNA y Archivo Nacional Aruba (ANA) ta e dos institutonan publico principal di patrimonio cultural di Aruba. Cu hopi aña di colaboracion den e campo di preservacion y accesibilidad cultural, e dos institutonan aki ta compromete profundamente cu proteha y comparti e herencia documental y audiovisual di e isla. Nan liderazgo den transformacion digital, acceso habri y involucramento comunitario a pone nan den un posicion pionero den iniciativanan di cooperacion den Caribe Hulandes y mas leu cu esey.

Coleccion Aruba

            Lansa den 2022, Coleccion Aruba ta un iniciativa digital nacional di herencia cultural, desaroya den un alianza dinamico entre BNA, ANA, y Fundacion Cultural UNOCA. E proyecto ta uno historico den innovacion regional, uniendo coleccionnan di diferente instituto bao di un plataforma digital habri.

Obhetivo di e proyecto:

• Desaroya un plataforma digital inclusivo y multilingual cu ta presenta coleccionnan cultural, historico y academico di Aruba.
• Preserva materialnan fragil pa medio di digitalisacion y garantiza acceso a largo plaso.
• Promove colaboracion sostenibel entre institutonan di patrimonio Arubano, y institutonan cu coleccionnan Arubano/Caribense den e region y internacionalmente.
• Sirbi como un modelo regional di innovacion digital y solidaridad.

Innovacion y Metodologia:
Coleccion Aruba ta innovativo den e siguiente forma:

• Un structura basa riba red di cooperacion, cu ta garantiza participacion igual entre BNA, ANA, y otro institutonan.
• Uzo di tecnologia habri (open-source) y standardnan internacional (IIIF, XML/JSON API) pa facilita escalamento y compatibilidad.
• Desaroyo di un marco comun pa metadata, pa uniformidad di registro den diferente coleccion.
• Diseña na Papiamento y Ingles pa accesibilidad y inclusion, cu un modulo di traduccion integra (via Google Translate) pa yuda lector den tur idioma.
• Participacion di curadonan comunitario, investigador y hubentud pa co-crea contenido y exposicionnan digital.
• E iniciativa aki ta e prome di su tipo na Aruba y un di e prome den Caribe cu ta uni coleccionnan nacional bou di un sistema digital unifica.

Resultadonan y Impacto:

• Mas di 150,000 item—incluyendo corantnan, potret, video, obranan 3D, buki, revista, tesis, arte, mapa, historia oral y manuscritonan—a wordo digitalisa y pone disponibel. Tur contenido ta buscabel den texto completo.
• E proyecto a mehora acceso y uzo di patrimonio nacional pa investigador, educadornan y publico na nivel local y global.
• A fortalece cooperacion entre institutonan, modernisa practicanan di archivo, y inspira un cambio cultural pa uno mas habri y innovativo.
• A ricibi reconocimento internacional, incluyendo Internet Archive Hero Award 2024, ACURILEANA Medal of Excellence, y recientemente un designacion di UNESCO Memory of the World pa partinan relaciona cu sclavitud.
• A bay den medio internacional manera PBS Newshour, Wired Magazine, The Verge y outletnan Caribense y Europeo.
• Mas importante, e proyecto a duna institutonan chikito e infrastructura digital, formacion y visibilidad cu nan mester.
• E coleccion digital ta inclui hopi item tocante otro islanan den Caribe Hulandes, haciendo di Coleccion Aruba e coleccion digital mas grandi di e region. Aruba ta actualmente colaborando cu isla manera Boneiro, Saba, Statia y St. Maarten pa desaroya e tipo di plataforma digital pa nan tambe.

            E premio OCLC ACURIL ta confirma cu Coleccion Aruba ta un ehempel bibo di con innovacion, colaboracion y compromiso comunitario por cambia e manera den cual  ta preserva y comparti nos herencia cultural. Aruba por ta orguyoso di e liderazgo cu su institutonan ta demostra den e area vital aki.