Reputacion trahadornan Arubano den turismo a crea aspecto preocupante
*Falta di personal na Aruba vs. atraccion personal Arubano den exterior
*Turismo a bira motor economico di Caribe den ciere di refinerianan
ORANJESTAD(AAN)—Na 2020 Covid-19 a lanza un atake historico riba economia mundial. Un virus a bira enemigo inespera y desconoci di economia mundial y asina tambe di Caribe, cu ya tabata den un situacion di emergencia.
E problema di region di Caribe a cuminsa realmente den decada 80, ora cantidad di refineria den region Caribense, a cera nan porta.
Aruba no tabata e unico pais den region di Caribe, cu durante añanan 80 a mira su creador di empleo despedi di su economia cu tabata basa riba Lago.
Ocho refineria grandi mas den Caribe mester a corta den nan produccion mientras cu na Merca, mas cu cien refineria a cera nan porta for di 1981.
Ciere di Lago a nifica pa Aruba no solamente e final di entradanan y otro beneficionan economico y financiero enorme tanto pa e pais como pa trahador.
Na inicio di Status Aparte, Aruba tabata uno di e lista di paisnan den e region Caribense cu mester a habri un caminda nobo pa produccion financiero y economico, cu mester a restablece e bida social.
Historia economico a conoce un pagina nobo cu a wordo busca den turismo, cu a nace for di e deseo di viahe cu a acompaña curiosidad y conquista humano semper.
Turismo a entrega Aruba un economia nobo pero tambe sumamente fragil, manera e pandemia Covid-19 sigur a demostra, aunke un aspecto sumamente importante, no a ricibi e atencion cu e merece.
E nacemento di turismo den region di Aruba, tabata directamente relata na e Epoca di Oro, cu a sigui Segunda Guera Mundial.
E recuperacion economico mundial despues di Segundo Guera Mundial, tabata debi na e sumanan enorme cu a wordo hinca den economia mundial. Den e epoca di oro barconan di turista for di Merca, tabata nabega den region di Caribe, caminda benta di entre otro joyas y marcanan famoso di productonan na turista, a aumenta.
Esaki tabata e oportunidad pa Aruba entrega mundo un aspecto importante, cu ta e forma ehemplar cu Pueblo di Aruba ta atende cu su bishitantenan.
E Arubiano a bira mihor sosten di economia basa riba servicio y a transforma Aruba den un pais cu cordialidad como su atraccion mas grandi.
E servicio cu e Arubiano ta duna un bishitante ta unico y ta e base di e exito di turismo na Aruba, cu sigur despues di Covid-19 mester a gara duro na turismo como productor economico.
Companianan nobo continuamente ta bira participante den e crecemento di turismo den region di Aruba y ta den necesidad di personal, cu ta e aspecto clave den e industria di servicio cu turismo ta.
E cantidad di proyectonan turistico den region di Aruba ta subi cu un rapidez enorme y mester atrae personal.
Informacion cu DIARIO a ricibi awor ta duna tur indicacion, cu companianan hotelero na otro islanan den vecindario y sigur di e islanan Hulandes den Caribe, ta trata na atrae trahadornan di Aruba, pa duna servicio na turistanan na nan compania na nan pais cu tambe ta basa riba turismo como motor economico.
Esaki ta causante di un preocupacion grandi na Aruba, cu ya tin scarcedad di personal, pa cual mester busca solucion.
Aparentemente e sumanan cu ta ofrece na e trahadornan di Aruba, ta atractivo loke ta wordo considera como mas problema pa Aruba, cu ya tin scarcedad di personal manera ta bon conoci den comunidad.
Informantenan ta papia di intentonan serio di companianan di entre otro Curacao, Bonaire y Sint Maarten pa atrae trahadornan di Aruba. A wordo mustra cu mester aumenta e interes y incentivonan pa studiantenan Arubano di Hulanda bolbe Aruba y pa Arubianonan participantenan na economia Arubano, no acepta cantidad di oferta cu ta wordo ofrece abiertamente.
DIARIO ta sigui vigila e situacion alarmante pa Aruba, cu ya tin necesidad di trahador pa sostene su industria di turismo.
