ORANJESTAD (AAN): Siman pasa City Inspector a manda un recordatorio pa henter pueblo di Aruba, pa corda cu ley di cacho ta na vigor, y ta suplica pa tur hende mantene nan mascota den cura di cas.
Den DIARIO esaki tambe a sali, y Bureau City Inspector a suministra un precioso potret di cuatro cacho, bunita asina den cura di cas cu ta vigila tur actividad pafo di nan cura, pero ta kedando netchi asina paden.
Aparentemente e mensahe a wordo interpreta robez. Pesey den fin di siman, City Inspector a aclarea y duna informacion extra riba nan publicacion cu a sali den prensa y tambe riba nan pagina di Facebook.
Bureau City Inspector a publica un potret cu algun cacho den cura na un cas. City Inspector ta declara cu e cachonan aki NO ta wordo maltrata, ni ta malnutri y tampoco ta cana los riba caminda publico.
E meta tras di e potret aki tabata pa concientiza pueblo pa tene nan cacho den nan cura. E potret aki ta demostra cu e doño di e cachonan aki na forma ehemplar ta tene su cachonan den su cura.
