Ministro Ursell Arends a afirma e postura di RAIZ prome cu eleccion --- *Ursell Arends no a hunga superman cu un agenda scondi pa e score --- *Serlimar casi a muri na man di cirurgia plastico pa sconde cara di berdad
ORANJESTAD(AAN)—Na momento cu problema a surgi siman pasa atrobe na Serlimar, e ora di berdad a yega pa Ursell Arends como politico activo y gobernante di Aruba.
DIARIO a limita su mes na prome resultadonan di analisis y investigacion y tabata mantene su bista dirigi riba e pasonan cu Ministro Ursell Arends mester a tuma.
Dos punto tabata sumamente importante. Ministro Arends lo a bay crea un cortina di huma cu lo a stroba Pueblo di realisa e problema serio cu mester wordo atende?
Ministro Arends lo a bay busca popularidad politico, hunga sabi?
Ambos pregunta ta relaciona directamente cu e hecho cu na 2021 Pueblo a entrega e partido RAIZ e votonan cu RAIZ a pidi pa den Gobierno e soluciona problemanan di Aruba.
Den e resultadonan di 2021, e cantidad di voto cu RAIZ a haya tabata un factor di sumo importancia, pasobra tabata conoci cu pa MEP traha cu AVP, Marisol of Accion-21 no por a wordo menciona como posibilidad aunke den politica nada ta imposibel.
E maneho cu a wordo hiba door di Prome Ministro Wever-Croes kende a briya pa e forma cu e no a sconde berdad pa Aruba y a opta pa gobernacion realistico, no tabata laga otro opcion cu no ta entrada di RAIZ como partner den gobernacion di Gabinete Evelyn Wever-Croes 2.
E forma cu representantenan di RAIZ a presenta nan mes na Pueblo a duna nan credibilidad como gobernante cu no ta hinca Aruba den aventura ni fantasia.
E caso Serlimar a bira un test case. Ministro Ursell Arends lo a hunga Superman, manera den pasado Mike de Meza y Benny Sevinger a hunga pa na 2017 entrega un Serlimar cu casi tabata yega fondo di lama na 2017?
Despues kico a pasa cu Serlimar bou Ministro Otmar Oduber, cu awe ta acusado di Husticia?
Nos no kier papia mes di e tempo di Marisol, pero kier sigui directamente pa e hecho cu awe Ursell Arends mester atende su prueba di candela.
Awe Ministro Arends mester duna Aruba e prueba cu por otro na Serlimar y si nos mira su salida, nos ta kere cu ya el a presenta e solucion.
Ministro Arends a nenga di bandona e base legal di Serlimar, cu nunca a permiti wega politico cu a wordo hunga den e compania.
E structura legal di Serlimar tabata e prome difunto den e tragedia di Serlimar y Ursell Arends a nenga di sigui cu un tradicion cu lo a haci cu por dal porta di Serlimar cera awor.
Naturalmente for di e poz seco di politica barata por scucha gritonan di entre otro Benny Sevinger y Mike de Meza cu Pueblo conoce den e chasconan politico cu a resulta den e persecucion penal di Avestruz y e rapport di Refineria di Aruba den cual Mike de Meza su nomber ta mas cu menciona.
Di nos banda nos ta aplaudi cu Ursell Arends no a scoge pa politica barata pero ta indica cu ta hunto Raad van Toezicht, Gerencia di Serlimar y Gobierno mester haya un solucion.
Hunto ta nifica cu no tin espacio pa Superman bula den selva politico pero ta habri caminda pa capacidad y miho intencion di tur envolvi, haci cu ta yega na un solucion pa e problema serio di Serlimar.
Na entrada di un siman nobo, mester yega na e prome conclusion di e impresion cu Ministro Ursell Arends a crea pa medio di Serlimar.
Nos mester papia di seriedad cu a bini dilanti den e forma cu el a atende cu e problema.
Den e forma cu te awor Ministro Ursull Arends a atende cu Serlimar, nos ta topa cu un maneho di acuerdo cu e loke RAIZ a priminti Pueblo prome cu eleccion, cu ta gobernacion cu ta scrap politikeria, cera caminda pa corupcion y a base di berdad y integridad ta yega na logronan pa Aruba.
DIARIO lo sostene e maneho aki cu Aruba mester pa por recupera despues di crisis tras di crisis provoca pa abuso politico cu a rementa na 2017 y despues Covid-19.
Nos ta di acuerdo cu Ministro Ursell Arends cu e momento a yega na no mas cirurgia plastico pa sconde e berdad di Serlimar, pero accion dirigi a base di ley y di realidad y honestidad.
