NGO's ta para firme tras di e plan nacional di reforestacion

ORANJESTAD (AAN): Recientemente, Prome Minister mr. Mike Eman, a invita un cantidad di stakeholder pa e plan nacional di reforestacion.

Expertonan di diferente fundacion, NGO's y departamento di Gobierno a uni pa hunto pensa e miho manera pa acerca y ehecuta e plan aki.

Crescenzia Biemans, CCO di Bucuti and Tara Beach Resort y Board Member di The Bucuti Tara GMC Nature Preservation Park na Noord, tambe a participa na e "brainstorm session" aki y ta haya e iniciativa aki hopi importante, mirando cu naturalesa ta e recurso di mas importante cu nos tin riba nos isla. Nos naturalesa ta un simbolo di nos cultura y herencia pero tambe locual ta atrae turismo, cu ta nos pilar economico principal. Ta crucial pa mantene locual nos tin pero tambe pa trece bek locual a bay perdi durante decadanan. 

Aruba a perde gran parti di su flora y fauna pa motibo di desaroyo, y esaki ta e oportunidad pa restaura nos naturalesa pero tambe educa e siguiente generacion riba e importancia di nos naturalesa y e motibo pa cual mester preserva esaki, pero tambe pa siña nos muchanan kico tur nos tabatin na Aruba. 

The Bucuti Tara GMC Nature Preservation Park ta traha di cerca cu NGO's y Parke Nacional y pa mira e vision aki crece asina hopi y mira iniciativanan priva cu tambe ta hayando sosten, ta duna un sentimento di satisfaccion enorme y ta un señal cu e vision di Gobierno ta alinea cu esun di e stakeholders. 

Greg Peterson, Presidente di Aruba Birdlife Conservation, tambe a contribui cu su conocemento na e sesion aki. Segun Peterson, e comunidad di Aruba tin e anhelo pa mehora nos naturalesa pa basta tempo y ta contento cu awo sin tin un iniciativa asina grandi pa restaura nos naturalesa. 

"Masha tiki hende ta realisa con importante e proyecto aki por ta pa nos futuro, pa nos pais, turismo y nos naturalesa". "E plan aki ta un "mind shift" cu ta tumando luga riba e nivel di mas halto politico di Aruba, cu ta porfin na su luga", Peterson a enfatisa. Aruba Birdlife Conservation hunto cu algun hotel, ta trahando caba riba e parti di proteccion y conservacion di nos naturalesa y tin sosten di tanto NGO's como di comunidad, comercio y e sector hotelero cu ta dispuesto pa pone fondonan disponibel y ta haci nan parti di e solucion. 

Educacion ta keda crucial, y pa Peterson esaki mester bira parti di les na scolnan. Reforestacion no ta solamente planta mata y cla, sino ta e proceso completo cu ta inicia cu e sembramento, plantamento, cuido y mantencion. Reforestacion ta un vision grandi y planta 100 mil mata den cuater aña ta un obhetivo ambicioso pero ABC ta para 100% su tras.