*Semper ta bon pa refresca e ley y reglanan di trafico
ORANJESTAD (AAN): Varios biaha tanto DIARIO como Cuerpo Policial di Aruba a bolbe recorda chauffeurnan na Aruba riba e regla ora nan ta moviendo riba caminda di double-via.
Pues bo tin di corda cu bo mester keda core solamente na banda drechi. Bo mag di bay na banda robes solamente ora di pasa un auto, of ora bo yega rotonde unda bo ta bay sali bek na e salida banda robes.
Esaki ta un recordatorio cu Aruba tin diferente sorto di caminda, y Polis ta kere cu semper ta bon pa refresca e ley y reglanan di trafico.
Un ehempel riba Green Corridor, Avenida Nelson Oduber, y Watty Vos Boulevard, abo como chauffeur tin di corda cu semper bo ta maneha bo auto na e parti drechi di caminda. Ta diferente chauffeur a yega di haya boet pa esaki ora nan a wordo gara ta core riba Sasakiweg (cu awor a bira Avenida Nelson Oduber).
Algun tips: Djis tene cuenta cu e consehonan aki suministra pa Cuerpo Policial di Aruba:
(*) Abo como manehador di auto por pasa un otro auto pero mester bay back na man drechi.
(*) NO por keda core na man robes riba e camindanan menciona.
(*) Den ley di trafico tampoco conoce “fast lane” ni tampoco “slow lane”.
Chauffeur riba e potret: E chauffeur riba e potret aki por haya un boet basta pica, si acaso Polis a gar’e. Pasobra el a djis core for di rotonde-pa-rotonde na banda robes, siendo cu e NO ta pasando ningun auto, y e rotonde mes ta basta leu ainda.
Polis ta convenci, cu un trafico sigur pa ami cu bo ta bal tur cos! Semper sigui nos regla y leynan di trafico!
