Segun Jimmy Douglas di Aruba Ariba Tours:
ORANJESTAD (AAN): Dos siman despues di e protesta di operadornan di tour, cu a sali pa expresa nan malcontento contra e blokeo di costa nort pa UTV y ATV, Jimmy Douglas di Aruba Ariba Tours a duna un update tocante e situacion y e dialogonan cu ta tumando luga actualmente.
Douglas a remarca cu Huez a duna un periodo di cinco siman pa dialoga cu e diferente partidonan concerni, cu e meta pa busca un solucion cu eventualmente por permiti habrimento di rutanan bek.
El a gradici Minister di Infrastructura, Herde, y su delegacion, como tambe DNM y DIP, pa scucha e preocupacionnan di e grupo y pa acompaña nan pa observa e rutanan alternativo cu eventualmente por wordo crea.
Segun Douglas, e intencion ta pa yega na un solucion cu por minimalisa daño na medio ambiente, pero na mes momento trece trankilidad bek den e sector, pa e companianan di tour por sigui ehecuta nan trabou den un manera responsabel y sin e incertidumbre cu tin actualmente.
Douglas a remarca cu e negociacionnan te awor ta positivo. Sinembargo, el a señala cu ainda tin partidonan importante cu no a participa den e reunionnan, algo cu, segun e, ta crucial pa por yega na un solucion completo.
Mientras tur e partidonan necesario no ta sinta na mesa, e a indica cu ainda ta existi duda si e palabracionnan haci lo wordo traduci den accion concreto.
Di parti di e operadornan, Douglas a bisa cu nan a presenta diferente propuesta y accion. Entre otro, nan a entrega un Nature Driving Protocol, presenta ideanan pa designa rutanan alternativo, propone opcionnan pa reduci stof y introduci programanan pa educa guianan.
“Nos a bin cu hopi cos, pero obviamente e awa cu nos a pone den biña tin cu topa cu awanan cu nan tambe tin pa pone den biña. Aki ta unda cu nos ta aworaki, wardando e dialogo y wardando otro ministerionan tambe,” Douglas a expresa.
El a agrega cu, apesar cu Minister Herde actualmente ta traha activamente hunto cu e sector y prioridad ta poni riba e ruta, e proceso no por keda limita na un solo ministerio.
“Apesar cu Minister Herde ta hopi bon bezig cu nos actualmente, y prioridad a keda poni riba e ruta actualmente, toch Huez a manda nos sinta cu Gobierno, y esey ta inclui otro mandatarionan tambe. Ainda mester reuni cu Minister di Turismo, Minister di Economia y Minister di Husticia,” Douglas a bisa.
Cu enfasis riba e solucion pa e rutanan, Douglas ta spera cu den e tres simannan cu ta resta, e dialogonan lo intensifica pa asina e diferente partidonan por yega cerca di otro y concretisa un solucion.
“Nos tin hopi otro alternativa y solucionnan riba mesa cu e cos aki no tin nodo di yega na Huez mes. Pasobra nos tambe ta bogando pa reforma pa hopi aña caba. Y awo e ta cayente atrobe den noticia y nos kier un trankilidad pa asina nos sigui den futuro sin tanto polemica rond di nos ofishi,” Douglas a termina declarando.
